Shillong, Risaw 23: Ka Hynñiewtrep Youths’ Council (HYC) kala dep aiti noh iaka dorkhas sha u Director jong ka North Eastern Indira Gandhi Regional Institute of Health and Medical Sciences (NEIGRIHMS), Shillong, ban dawa pyndonkam da ka bhah (quota) ba kyrpang iaki samla ka jylla Meghalaya na ka bynta ka B.Sc Nursing.
Kane ka seng kala dep pynpaw iaka jingeh bakhraw ba ka thup kyrteng kaba shipor na ka bynta ka por pule 2026 haduh 2027, kaba la pynbna ha ka 7 tarik Nailur 2026, ka kynthup ia 48 ngut ki kyrtong bad ym don ba ioh na Meghalaya.
Ka seng HYC kala ong ba watla ka ieng skhem bad burom iaka nongrim kaba iadei bad ka thong jong ka ri jong ka NEIGRIHMS bad ka nongrim ban pynrung kam lane pynrung skul katkum ka jingbit lane ka merit, ba donkam pat ban ai iaki khynnah skul ka jylla Meghalaya iaka kabu kaba bit bad kaba don hok ban ioh rung bad ioh pule iaka kam nursing ha kane ka jaka pule kaba khraw jong ka sorkar pdeng kaba don ha la ka jong ka jylla.
Ka seng kala kyrpad iaka NEIGRIHMS ba kan sngewthuh halor ka rukom pyn bynta shuki na ka bynta ki samla pule ka Meghalaya ha ki kam pule MBBS hapoh NEIGRIHMS, Shillong bad ka jingsyriem jong ka bad ka rukom treikam ha Regional Institute of Medical Sciences (RIMS), Imphal, bad iaka rukom reserved shuki.
Ka HYC kala kyrpad kyrpang ba ia kane ka mat dei ban ujor hapoh ka dorbar pyniaid sha ki bor pyniaid jong ka dei peit jong ka sorkar kaba la buh iaka jingialang ha ka 27 tarik Risaw 2026, namar ban wanrah iaka bhah ne quota thung kam lane pynrung skul katkum ki jylla bad ban pynkylla iaki niam ki rukom kiba don lypa mynta.
Ka seng ka ngeit ba lada shimkhia ia katei, kan iarap ban ioh ka jingbha jingmiat ha ka pule puthi ki samla ka jylla bad kane kan pynioh iaki nongtrei ba tbit jong ka koit ka khiah ha ka jylla Meghalaya.
Ka HYC ka kyrmen ba ka NEIGRIHMS bad ki bor ba dei peit ba kin kit khlieh ia kane bad shim iaka sien jam ba iadei khnang ban pynthikna ba ki samla pule ka jylla Meghalaya kin ioh ka lad ban pule nursing ha la ka jong ka jylla.
