Shillong,Risaw 23: Mynta ka sngi 23/Risaw/2026 ka Meghalaya Pradesh Youth Congress kala kynnoh ba bun kiba ioh kam nos ha NEIGRIHMS kiba bun ki dei na ka jylla Rajasthan, la ong ba na ki 231 tylli ki kam kiba lait bad 111 ngut ki dei na Rajasthan bad 85 ngut na Meghalaya.
Kane ka jingpynrung kam ka dei ha u snem 2019 shwa ka Nursing Officer Recruitment Common Eligibility Test hadien ba la leh ia kane ka exam ha u Nailar 2023 ki ophisar ha ka kam nos ba la shah thung na Rajasthan ki don 134 ngut bad na Meghalaya pat tang 15 ngut.
U samla Eugene Jarain president Block Congress Committee Laitumkhrah u la ong ba u iohi ia kane ka jingiapher kaba iapher bak la bak kane ka jingthung kam ka long ha ka jinglah ka jong ki, kawei na ka daw jong ka jingduna ki samla na Meghalaya ban ioh kam ka dei namar bym don ki jaka ai jinghikai ‘Nurses Coaching Centre’.
U nongialam ka MPYC u la ong ba hapoh ka jylla Rajasthan ha man la ki dong bad ki jaka ki don ia ki jaka ai jinghikai kumno ban iakhun ia ki exam nos, hynrei kaei kaba ki ia kren mynta ka long ka jingbun palat ki nos shynrang ha katei ka hospital bad kane ka wanrah ia ka jingbym sngew shngain.
Kumba iatip ki nongpang ha ki jaka sumar ki kham sngewtynnad ia ki nos kynthei, hynrei kiba bun pat ki tnad ai jingsumar ha NEIGRIHMS la bun ki shynrang ia kaba ym pat lah ban pdiang, hooid ka jingdon jong ki kam dei kaba beain hynrei kaei kaba ki kwah ba ka jingdon ki nos ka long ba ki nos kynthei ki dei ban don 80% bad ki nos shynrang 20%.
Kane kam dei ka jingdawa kaba ki dawa khyllah hynrei kaei kaba la don bad kaba la pyntreikam, kum ka AIMS 80% ki nos kynthei bad 20% ki nos shynrang hynrei kaba sngewsih ka long ba u Director ka NEIGRIHMS lyngba ka Instagram u la ong ba kane ka hospital kam pat dei kata kaba ia ryngkat bad ka AIMS kim pat lah ban leh ia kata ka bhah thung kam 80% la 20% kumta ka NEIGRIHMS ruh ka dei ban bud noh ia kane ka bhah thung kam.
