Shillong, Kyllalyngkot 19: Ka seng United Democratic Party (UDP) kan phah ar ngut ki MLA jong ka sha Delhi ban leit ban ai ia ka jingujor halor ka jingkynnoh ba don ki politician kiba ia don bynta bad ki seng lehnoh ha kane ka jylla.
Ka seng UDP ka la jied ia u Dr Jemino Mawthoh bad ia u Bah Titus Khyne ba kin mih na Shillong la shai ka sngi ba kin leit ban ia kynduh ia ki heh jong ka sorkar pdeng ban ai ka jingujor halor ka jingphla jong u Chairman ka ANVC(B) u Rimpu Marak bad u don ka jingiadei bad u myntri rangbah ka jylla u Dr Mukul Sangma.
Na ka liang jong ka UDP kala shim khia ia kane ka jingmih khubor kaba la kynnoh da u tei u nongialam ka seng lehnoh kaba don mynta hapdeng ka jingsngeh ia siat bad ka sorkar. Ka UDP kala shim ia kane ka rai ha dien ba ki la ia kren ha ka jingialang jong ka party.
U Bah Bindo M Lanong Deputy Chief Minister ba rim ka jylla u ba dei u nongialam jong ka seng UDP haba kren ha u SP News Agency u la ong ba ka party ka la shim ia ka rai ban phah ia kitei ki ar ngut ki MLA ba kin leit sha Delhi lashai ka sngi.
Na ka liang jong u myntri rangbah u Dr Mukul Sangma u la kren ha ki nongthoh khubor ha kine ki sngi bay m don kanokano ka jingiadei bad ki seng lehnoh kane ka jingkynnoh baroh ka dei tang ka buid ban pynbud nam ia u.(SP News)
