Shillong, Iaiong 17: Ka Jaintia National Council (JNC) Western Zone ba ialam khmat da i bah Hamehi Bamon ba long kum u President jong ka seng ryngkat bad ki dkhot jong ka, ki la ialeit ban ia kynduh iaki ar ngut ki Executive Engineer jong ka P.H.E kiba dei incharge iaka West Jaintia Hills District.
Kaba kila ioh ban ia kynduh ki dei u E.E jong ka Electricals division bad u E.E jong ka civil division ba incharge jong ka R.W.S. u Shri Sokima Najiar ka seng ka la ai ruh bad ka jingthoh haki. Ki daw ba leit mih ka seng sha ka ophis treikam jong ki ha kaba iadei iaka jing pyntrei torty iaka skim Jal Jeevan Mission ka hok jong u paitbah.
Hadien ba la ud la nam kiba bun na ki nong shongshnong jong ka District, namar lah bun ki shnong kiba lah dep ban trei bad pynshna iaki top um iaki pipe um ban pynpoi um sha ki ïing ki briew tangba ka shu sahkut tang ban pyndep shna iaki top pynlang um kumjuh iaki pipe um ,katba iaka jingpynpoi um haki top um lane cha ki ïing ki briew ym don.
Kaba pynbitar jur iaki paitbah kumjuh iaka seng namar lah bun bha ki shnong ki top ki lah tyrkhong wat lah dep ban pyntrei tangba khlem da pynpoi um haki top um, ka long tang kum ka frame khlem don ei ei, ia kane ka rukom trei jong ki iaka skim JJM naka 100% ka long tang kumba 25% ki shnong ki ba poi um bad kiba biang um kiba la ioh kat kum ka hok jong ki na kane ka skim supply um.
Wat lada bun ki shnong na ka liang ki tnad kane ka department ki la plie bad ki la kam ba ki lah dep ban pyntrei tangba kane ka rukom pyntrei kam don jingmut bad kam don jingmyntoi iaki paitbah,kat kum ba lalap da ka seng wat ba ki lah kam ba ki lahdep ban pyntrei ruh hynrei kam long kaba trei kam.
Ki top um ki pipe um ki lah tyrkhong bad ki la sdang sop sarang, ha kaba ia dei bad kane ka seng ka la ong don ei ei shalyndet ba ki la pyndankam bakla iaka pisa iaka hok ka bynta u paitbah na kadaw bym shimkhia naka department ia kine baroh.
Ka JNC ka la kyntu jur ia kine ki E.E ba kin leh ia kane ka kam kham kloi ban pynpoi iaka um katkum ba dei ban poi sha baroh ki shnong ki jaka ki bym don um bad ki bym iaid tynrih ka rukom pynpoi um ha ki top lane sha ki ïing biew kat kum ka skim kahok jong u paitbah ha kino kino ki shnong ba lah dep ban pynshtrei daka Skim JJM.
Naka liang kine ki sahep PHE ki la kular iaka seng ba kin shimkhia ban leh ia kane ka kam kham kloi ha kine hi ki sngi ban pynbha bad leit jurip ha kylleng ki shnong, khamtam ha kito ki shnong bym wan ka um ha ki top lane bym poi um sha ki ïing briew.
Ka seng ka maham iaka Department ban pyn treikam noh hapoh 2 bnai ha kaba iadei bad kane ka jing ujor,ka seng kam shong kli kti lada ka seng ka dang lap ba kim shimkhia ia kane ka kam kat kum ka kamram jong ki, kaseng kan sa leh da kawei pat kalad ka lynti da kaba tyngeh.
