New Delhi, Iaiong 17: U Myntri Sorkar Pdeng ba dei khmih ia ki tnat kam poh iing bad kam iatreilang, Amit Shah, haba u la iashim bynta ha ka jingiakren ha ka Lok Sabha halor ka Delimitation Bill, 2026, ka Constitution (131st Amendment) Bill, 2026, bad ka Union Territories Laws (Amendment) Bill, 2026, u la ong ba ka don ka jingpyrshang ban pynsaphriang ia ka jingsngewthuh bakla ba hadien ba la mynjur ia kine ki lai tylli ki bill, ki seat jong ki jylla ha ka thain shathie ha ka Lok Sabha kin sa duna bha bad ba kin sa mad ia ka jingduh kaba khraw.
U myntri ka tnat kam poh iing jong ka sorkar pdeng u la ong ba kane ka Delimitation Bill, 2026 kan ym ktah ia ki jylla ka thain shathie hynrei, ha ka jingshisha, kan ai jingmyntoi ia ki. U la pynpaw ba hapoh ka rukom pynkiew 50%, ki 543 tylli ki seat ba mynta ha Lok Sabha kin kiew sha ka 816 tylli, kaba wanrah ïa ka jingkiew ha ka jingdon ki seat na ka bynta baroh ki jylla ka thaiñ shathie. U myntri ka tnat kam pohiing jong ka sorkar pdeng u la bynrap ba ki 129 tylli ki seat kiba don mynta jong ki jylla ka thain shathie ha Lok Sabha kin kiew sha ka 195 tylli, bad ka bhah jong ki ha ka jingdon ki seat baroh ha ka iing dorbar kan dang sah la jan kumjuh kaba long kumba 24 percent.
U Amit Shah u la iathuh ba ha ka iing dorbar kaba mynta kaba don 543 ngut ki dkhot, ka Karnataka mynta ka don 28 ngut ki dkhot, kaba long kumba 5.15 percent na ka jingdon baroh. Hadien ba la mynjur ïa ki bill ba la tyrwa bad ka jingpynkylla ïa ka riti synshar ka ri, ka jingdon jong ki seat na ka bynta ka Karnataka kan kiew na ka 28 sha ka 42. Ha kata ka khep, ha ka Lok Sabha kaba don 816 ngut ki dkhot, ka jingmihkhmat jong ka Karnataka kan sah haduh kumba 5.14 per cent, namarkata, ka Karnataka kan ym mad ïa kano kano ka jingduhnong.
U myntri ka tnat kam pohiing jong ka sorkar pdeng u la ong ba ka Andhra Pradesh mynta ka don 25 tylli ki seat, ha kaba ka jingmihkhmat ka long kumba 4.60 percent ha ka iing dorbar kaba don 543 ngut ki dkhot. Hadien ki jingpynkylla ba la tyrwa, da ka jingkiew kumba 50 percent, ka jingdon jong ki seat kan kiew sha ka 38 tylli, bad ka jingmihkhmat jong ka Andhra Pradesh kan kiew sha kumba 4.65 percent. Kumjuh ruh ka Telangana mynta ka don 17 tylli ki seat, ha kaba ka jingdon jong ki nongmihkhmat ka long kumba 3.13 percent ha ka Lok Sabha kaba mynta. Hadien ka jingpynkiew kaba la thmu, ka jingdon jong ki seat kan kiew sha ka 26 tylli, bad ka jingmihkhmat jong ka kan poi haduh kumba 3.18 percent.
U Amit Shah u la ong ba u kwah ban pynthikna ïa ki paidbah ka Tamil Nadu ba ka bor jong ki kan ym duna hynrei kan nang kiew. Ka jingmihkhmat jong ka Tamil Nadu kan ym hiar; hynrei, kan sa nang roi. Kumba ka long mynta, ki don 39 ngut ki dkhot kiba la shah jied na Tamil Nadu, kaba long kumba 7.18 percent ha ka iing dorbar thawain kaba don 543 ngut ki dkhot. Hadien ka jingthmu ban kyntiew da 50 percent, ka jingdon jong ki seat kan kiew sha kumba 59, bad ha ka iing dorbar thawain kaba thymmai kaba don 816 ngut ki dkhot, ka jingmihkhmat jong ka kan long kumba 7.23 percent. Kumta ka paw shai ba kan ym don kano kano ka jingpynduna ia ka jingmihkhmat jong kine ki jylla; hynrei, kan don ka jingkiew.
U Myntri Kam Pohiing jong ka Sorkar Pdeng u la ong ba ka jylla Keralam mynta ka don 20 ngut ki MP jong ka Lok Sabha, kaba mihkhmat kumba 3.68 percent ha ka iing dorbar thawain kaba don 543 ngut ki dkhot. Hadien ka jingthmu ban kyntiew, kane ka jingkhein kan kiew na ka 20 sha ka 30, bad ka jingmihkhmat kan long kumba 3.67 percent.
U Amit Shah u la ong ba lada khein kyllum ia ka jingmihkhmat jong ka thain shathie jong ka India, mynta ki don 129 ngut ki MP kiba dei na ki jylla ka thain shathie ha ka iing dorbar thawain kaba don 543 ngut ki dkhot, kaba long kumba 23.76 percent. Hadien ka jingthmu ban kyntiew 50 percent, kane ka jingkhein kan kiew na ka 129 sha ka 195, bad ha ka iing dorbar thawain kaba don 816 ngut ki dkhot, ka jingmihkhmat jong ki kan long haduh 23.87 percent, kata, kumba 24 percent. Kane ka pynshai ba ka jingmihkhmat jong ki jylla ka thain shathie kan nang kiew.
U Myntri Kam pohiing jong ka sorkar pdeng uba dei ruh u Myntri ka Tnad treilang u Amit Shah u la ong ruh ba hapoh ka jingialam jong u Myntri Rangbahduh ka ri u Narendra Modi, ka Kynhun Myntri jong ka sorkar pdeng ka la rai ban pynlong ia ka khana samari ia ki caste, bad ia ki jingtip kiba iadei bad ka caste yn sa lum ruh ha ka khana samari ban wan. U la ong ba ia ka khana samari la pynlong ha ki artylli ki bynta—nyngkong, ka jingniew ia ki iing, bad nangta ia ki briew, ka bynta kaba nyngkong ka dang iaid mynta, ha kaba la niew ia ki iing, bad namar ba ki iing kim don ia ka caste, ym don bynta kaba iadei bad ka caste ha ka phom mynta. U Myntri kam pohiing u la bynrap ba yn buh jingthoh ruh ïa ki jingtip kiba ïadei bad ka caste katba dang lum jingtip shaphang ki briew ha ka bynta ba niew ïa ka jingbun briew.
U Amit Shah u la ong ba ngim shym la pynkylla ei ei ia ka Delimitation Commission Act; ngi la wanrah kumjuh ia ka Act, haduh ki full stop bad ki comma. U la ong ba lada ïa kane ka aiñ la pyndonkam na ka bynta kano kano ka jingleh thok ha ki por ba ladep, um lah ban kren ei ei halor kata, hynrei ka sorkar kaba mynta kam shym la pyrshang ia kum kata.
U myntri kam pohiing ka sorkar pdeng u la pynshai ba ka kaiphod jong ka Delimitation Commission kan treikam noh tang hadien ba la mynjur da ka Parliament bad ioh ia ka jingmynjur na ka President. Namarkata, kam don kano kano ka jingkylli ba kane ka rukom kan treikam hashwa u snem 2029. U Shah u la ong ba kane ka Ain kan nym don jingktah satia ia ki elekshon kiba dang iaid, la ka long ha Tamil Nadu ne ha West Bengal; ym don jingkylli ba yn pyntreikam ia ka shwa u snem 2029. Baroh ki elekshon ban long haduh u snem 2029 yn pynlong ha ki seat kiba la don lypa bad hapoh ka rukom treikam kaba mynta.
U myntri kam pohiing jong ka sorkar pdeng u Amit Shah u la ong ba ha ka synshar paidbah, ka bor ka wan na ka jingkut jingmut bad ka rukom pyrkhat jong ki nongshong shnong, ym tang da ki seng sain pyrthei ne ki nongialam. U la ong ba ym don mano mano ba lah ban ktah ia ka rai jong ki 1.3 billion ngut ki briew; lada kata ka lah ban long, kan ym don jingkylla ha ka sorkar ha ki por ba la leit noh.
U la ong ruh ba wat ha ka por jong ka Emergency ha India, ym shym la lah ban pynkhih ia ka jingmut jingpyrkhat jong ki briew, bad ki briew ki la ai ia ka rai jong ki lyngba ki lad synshar paidbah. U Amit Shah u la ban jur ba ym don mano mano ba don ka bor ban pynkut noh ia ka synshar paidbah ha ka ri, bad ka histori ka sakhi ba man la ka por ba la pyrshang ia kum kine, ki briew ki la kyntait ia ki.
