Shillong, Iaiong 23: U bah Paul H. Shylla u Senior Staff Officer and P.R.O. Directorate of Civil Defence and Home Guards la ong ba kin pynlong ia ka Civil Defence Mock Exercise on Air Raid 2026 ka ban long la shai ka sngi ha ka 24/Iaiong/2026 ha ka por 3.00 baje haduh 4.00 baje janmiet bad kankut ha ka por 7.00 baje mynmiet.
Haba kren ha ki lat pathai khubor mynta ka sngi u bah Paul ba dei ruh u PRO jong ka tnad Civil Defence Home Guards la ong ba kum kane ka Mock Exercise ka dang dei ka sien kaba ar ha ka jylla bad kane ka long ban hikai ia ki paidbah kumno ban leh lada ka don ka jingshah hiar thma na suin ha ki nongshun.
La ong ba kumne ka jingai jinghikai la juh leh lada don ka jingkhih jumai, hynrei kane kynti kaba mynta ka long lada don ka jingshah thombor ka Ri India ha ki ri kiba na shabar,lah ban long ha ki liengsuin, ki missile bad kumba la shem ha kine ki thma kiba dang jia la shem ba la pyndonkam ruh ia ki drone.
Ia kane ka Mock Exercise la ai kyrteng ka ARMEX-1 bad ia kane kin leh ha ka ar bynta kaba nyngkong kan long ka jingiarap ia ki briew ban pynlip ia ka ding bad ia kine kin leh ha kylleng jong ki District ka jylla bad kane ka sdang ha ka por 3.00 baje bad ha ka por 4.00 baje pat kan sa don ka jingpynpah ba kam don ei ei shuh bad kane kan long kaba khampher.
Ka bynta kaba kongsan kaba donkam ia ka jingiashnoh kti lang jong ki paidbah ka dei na ka bynta kaba ar ka long ban pynlip ia ki light baroh ha ki bynta jong ka jylla, kane ka long ban pynpulom noh ia ka jingthmu jong ki nongshun haba ki mut ban wan hiar thma ban pynhap bom ban pynjulor ha ki jaka hapoh ka ri.
