Shillong, Jymmang 5: Ka seng samla pule Jaintia Student Union mynta ka sngi kala leit ban ia kynduh ia u secretary jong ka Meghalaya State Pollution Control Board ban ai ia ka dorkhas ban dawa ba dei ban pynsangeh noh mardor ia ka jingsngap paidbah ha kaba ia dei bad ka jingthmu ban ai jingmynjur ia ka M/s Shree Cement Limited ka ban don ha Lum Syrman.
U president ka seng JSU jong ka shnat Khliehriat East Jaintia Hills u samla Leavingson Sama haba kren ha ki lat pathai khubor u la ong ba kila ioh ban ia kren bad u secretary ban pynsngew ha u ia ka jingpyrshah kaba ki paidbah kila ud la nam ha khmat ka seng haba ia dei bad ka jingsngap paidbah ka ban sa long ha ka 22/Jymmang/2026 ha shnong Daistong.
Kum ka seng kaba trei mon sngewbha ka wan ban ia kynduh ia ki bor jong ka MSPCB ban pynsngew ia kaei kaba ki paidbah na katei ka thain ki don ban ong ia kane ka jingbuh sngi ban pynlong ia ka jingsngap paidbah haba ia dei bad katei ka karkhana pynmih dewbilat bad ka jingwan ka seng ban pynpaw ia ka jingpyrshah ka long ba ki don syndah syndah bad ki paidbah.
Ha kane ka jingiakren ka seng kala kren shai ba dei ban pynduh pyndam ia kane ka jingsngap paidbah khang ba ki trai shnong kin ioh ia ka hok ka jong ki kum ka seng kan nym ai lad namar ki jingshah pynbiej jong ki katto katne ha ka buit jong ka kompeni namar kine kim tip kaei ka ban jia hadien habud bad kaei ka ban ktah ia ka mariang.
