New Delhi, Jymmang 12: Hadien ba nga la ioh ka lad ban long shi bynta jong ki artylli ki Chintan Shivir, nga lah ban ong da ka jingsngewskhem ba kane kadei kawei na ki sienjam ba biang por bad kiba ai jingmyntoi bha ha ka kam ialehkai jong ka India mynta.
Ngi shem ïalade ha ka por kaba kongsan ha ka jingïaid lynti jong ka ri jong ngi ha ka kam ïalehkai—kawei ha kaba ka jingthmu, ka jingbei tyngka, bad ka jingai mynsiem ki ïasohlang kum bym pat ju jia mynno mynno ruh.
Ha kine ki shiphew snem ba la leit, hapoh ka jingialam jong u Narendra Modi, ka kam ialehkai ha India ka la kylla sha ka kam kba kongsan. Ka don ka jingsngewthuh kaba shai ha ka ri shaphang ka jingdonkam jong ka—ym tang kum ka kam ban iashim bynta, hynrei kum ka bor na ka bynta ka koit ka khiah, ka jinglong ryntih bad ka burom jong ka ri.
Mynta, ngi iohi ia ka jinglong jingman kaba iar bad kaba iapher: ki sorkar jylla, ki seng treimon sngewbha, ki kompeni, ki synjuk, bad ki jaka treikam ha ki jaka nongkyndong baroh ki ianoh synniang shitrhem ha ka jingkyntiew ia ka kam ialehkai.
Kaba pynlong ia ka Chintan Shivir kaba kyrpang ka long ka jinglah jong ka ban wanrah ia kine ki nongshim bynta baroh ha kawei ka rynsan. Ka kam ialehkai, da ka jinglong jong ka hi, ka iasoh bad ki kam bapher bapher—ka kam shna tiar, ka kam pynbyrngia, ka jingkoit jingkhiah, ki lad pathai khubor bad ka pule puthi.
Ka Shivir ka iarap ban pyniasohlang ia kine ki bynta, kaba wanrah ia ka jingthmu ba iasam lang kaba donkam na ka bynta ka jingjop kaba jrong samoi. Ka rah shakhmat ïa ka jingïohi jngai jong ka ri katba ka pyni ruh ïa ki rukom treikam kiba bha tam na ki jylla bapher bapher, ka pynshlur ïa ka jingpynkylla dur bad ka jingsaindur thymmai.
Ym dei tang ka jingialang, ka Chintan Shivir kadei ka jaka ai jinghikai. Ka ailad ia ki nongshim bynta ban iasam ia ki jingmut, ban sngewthuh ia ki jingeh, bad ban iatreilang ban tei ia ki lad ki lynti.
Kalong ruh kum kaba ai mynsiem—ka pyni ia ki jingiathuhkhana jong ka jingjop bad pynskhem ia ka jingmut ba ka kam ialehkai ha India kam dei kaba kut tang ha ki takma, hynrei kadei shaphang ka jingiashim bynta, ka jingkynthup lang ia baroh, bad ka jingtei ia ka ri.
Ki sienjam kum ka Fit India Movement, ka jingrakhe ia ka International Day of Yoga, bad ki kam ba la ialam da ka imlang sahlang kum ki jingialehkai niah cycle ki la iarap ban batai thymmai ia ka rukom peit jong ngi ia ka kam ialehkai.
Ka jingpynleit jingmut mynta ka long ha ka “kam ialehkai na ka bynta baroh” ryngkat bad ka jingtbit ha ka kyrdan kaba hakhlieh duh. Ki jingangnud ban ioh takma bad ka jingiashim bynta paidbah kim dei shuh ki jingiakren ba kyrpang—ki long shi bynta jong kajuh ka jingiaid lynti.
Ka jingpynlong ia ka Shivir ha Srinagar ka la bynrap sa kawei pat ka jingmut. Ka jingitynnad jong ka nongbah ka ai ym tang ia ka mariang kaba itynnad, hynrei ka ai ruh ia ka jingsngew ba kynjai jong ka jingpyrkhat—kaei kaei kaba donkam na ka bynta ka jingiakren kaba don jingmut.
Ka jingmih kaba kham kongsan jong kane ka Chintan Shivir ka long ka jingpdiang ia ka Srinagar Khel Sankalp. Kane ka Sankalp kam dei tang ka jingbatai ia ka jingthmu—ka long ka phang pdeng kaba pyniatylli kaba pyniasohlang ia ki jingangnud jong baroh ki nongshim bynta ha ka kam ialehkai jong ka India.
Da kaba batai shai ia ki thong, ki jingthmu ba kongsan, bad ki jingkitkhlieh ba iasam lang, ka wanrah ia ka rukom treikam kaba pynshlur ia ka jingiatreilang ym ia ka jingiaphiah.
Ka bor ba shisha jong ka Srinagar Khel Sankalp ka shong ha ka jinglah jong ka ban wanrah ia ki nongiatreilang bapher bapher—ki sorkar, ki synjuk, ki riew shimet, bad ki sengbhalang—ha kajuh ka liang.
Ka pynskhem ia ka jingmut ba ia ka jingkiew ha ka kam ialehkai jong ka India ym lah ban pyniaid ia kane da ki sienjam kiba treikam marwei. Hynrei, ka dei ban ioh bor da ka rukom treikam kaba iadei, kaba iatreilang ha kaba ia ki jingdon jingem, ka jingtip, bad ka jingtbit la pyniasoh lang.
Kane ka jingpyniahap kalong kaba kongsan lada ka India ka kwah ban pynurlong ia ka jingangnud jong ka kaba jrong samoi ban long kawei na ki 10 tylli ki ri kiba hakhmat ha ka lympung ialehkai Olympic shuwa u snem 2036.
Ban tei ia ki nongialehkai kiba lah ban iakhun ha kylleng ka pyrthei ka donkam ym tang ia ka sap, hynrei ia ka jinglong jingman kaba iaid beit iaid ryntih ka jingithuh ia ki nongïalehkai ha ki jaka nongkyndong, ka jingai jinghikai katkum ka jingstad science, ki jingdon jingem, ka jingpyntbit ha kam ai jinghikai, ka jingioh iashim bynta ha ki lympung ïalehkai, bad ka jingkyrshan kaba iaineh ha ka pisa tyngka bad ki jaka treikam. Ka Sankalp ka plie lad ban pyniasoh ia kine ki bynta baroh ha ka rukom kaba iatylli.
Kaba paw bha na kine ki jingiakren kadei ka jingkyrmen ha kylleng ka jinglong jingman. Ka don ka jingngeit ba ïasam lang ba ka lawei jong ka kam ïalehkai jong ka India ka long kaba phyrnai, bad ba lyngba ka jingïatreilang, ngi lah ban tei ïa ka rukom ïalehkai kaba khlaiñ, kaba kynthup lang ia baroh, bad ka kam ialehkai kaba tbit.
Ka Chintan Shivir kalong, ha kiba bun ki liang, ka jingpyrshang kaba kyrpang— hynrei kaba la pynshisha lypa ba ka long kaba jop. Ka ban jur ia ka jingdonkam jong ka jingiakren, ka jingpyniahap, bad ka jingsngewthuh jingmut. Na ka bynta ka ri kaba iar kum ka India, kum kine ki rynsan kim long tang kiba myntoi—ki long kiba donkam.
Lada ngi kwah ban pynurlong shisha ia ki jingangnud jong ngi ha ka rynsan ialehkai ha ka pyrthei, kine ki jingiakren kidei ban bteng—bad ban ioh jingkyrshan da ka jingtreilang. Ka Srinagar Khel Sankalp ka ai ha ngi ia kata ka lynti.
Ka Chintan Shivir ka ai ha ngi ia kata ka rynsan. Kine baroh, ki ai ia ka India ia ka nongrim kaba khlain ban pynkylla ia ki jingangnud ha ka kam ialehkai jong ka sha ka jingjop kaba iaibteng ha ka Olympic. U Nongthoh udei u Chief National Coach na ka bynta ka kynhun ialehkai badminton jong ka India.
