New Delhi, Jymmang 16: Ka Sorkar Meghalaya, ha ka sngi thohdieng kala pynlong ïa ka jingialang ba lyngkot kum ka jingpynkhreh ia ka North East India Infrastructure Summit bad Exhibition (NEEINFRA) 2026 ban sa wan ha Meghalaya House, New Delhi, ka ban pyni ia ka jingkiew sted jong ka Jylla ha ka ioh ka kot, ka jingpynbun ia ki jingtrei bad ka bynta ba ka shim ha ka khana jong ka jingkiew shaphrang ka ri India.
U Conrad K Sangma, Myntri Rangbah ka Meghalaya ula ia shim bynta ha kane ka jingialang kum u Kongsan, katba u Sanjay Jaju, Secretary, Ministry of Development of North Eastern Region (MDoNER), ka Sorkar India, ula iadon lang kum u Symbud Kongsan.
Ki heh ki hain kiba la iadonlang ki kynthup ia u Avinash Joshi, IAS, Secretary ka Ministry of Food Processing Industries, ka Sorkar India, u Sanjay Goyal, IAS, Commissioner & Secretary ka Sorkar Meghalaya bad Chair, Organishing Committee, NEIINFRA, u Bajrang Lohia, President ka FINER nalor kiwei kiwei.
Kane ka summit, kaba la buh ban long ha Shillong ha ka 11 bad 12 tarik Jylliew, 2026, kan wanrah lang shi jaka ia san ngut ki Myntri ka Sorkar Pdeng, ki Myntri Rangbah na baroh ki Jylla ka thain Shatei Lam Mihngi, ki nongthaw policy, ki nongkynshew kam, ki nongpyntrei ia ki jingtei, ki Bank bad ki nongialam jong ki kompani ban iakren halor ki lad pyniasoh, ka jingkynshew paw bad ka jingkiew shaphrang jong ka thain.
Haba kren ha ka jingialang, u Conrad K Sangma, Myntri Rangbah ba don burom ka Meghalaya, ula ong ba ka ioh ka kot jong ka Meghalaya kala kiew arshah ha kine ki san snem bala leit noh, katba ka jingkynshew pisa kala kiew “saw shah haba nujor ia kaei kaba long naduh u snem 2018”.
Haba khot ia ka Meghalaya “kum kawei na kiba kiew sted bha ha ka ioh ka kot hapoh ka Ri”. Ula ban jur ba ka Jylla kala “iai bteng ban kiew ha kajuh ka jingsted ha kine ki lai haduh saw snem bala leit” ia kaba u ong, ka long kaba donkam na ka bynta ka jingshaniah jong ki nongkynshew kam.
Ha kaba kren halor ka Meghalaya Industrial Promotion Policy, u Conrad u la ong ba ka Jylla ka la pynmih ïa ki “jingai bun ki jingmyntoi” na ka bynta ki nongkynshew kam.
Ula ban jur ruh ïa ka rukom treikam kaba khlain ha ka liang ka seng kam seng jam ka Jylla, haba pynpaw ba ka jaka kala iai bteng ban ioh ia ka jingithuh halor ka jingdon ia ka “rukom treikam kaba biang palat na ka bynta ki nongsengkam hapdeng ki Jylla kiba rit”.
U Myntri Rangbah u la kren ruh shaphang ka rukom treikam ban pyniar ia ka lyngkha treikam ha ka IT ha Jylla, haba pynpaw ba ka IT park ba nyngkong ka Jylla ka dei kaba ka “dap sman” katba ka IT park ba-ar ka ban dang wan, kala sakhi ia ka jingkwah ban don bynta jong ki kompani kiba dei napoh ka Ri bad nabar ri ruh kumjuh.
Ula ong ba ka Meghalaya mynta kala iaid shaphang ban nang pyniar, da ka jingthmu ban tei shuh shuh ia ki jingtei jong ka IT ki ban plie kham bun ki lad ia ki samla.
U Sanjay Jaju, IAS, Secretary, Ministry of DoNER, ula iaroh ia ka jingiaid sted ka roi ka par ha Meghalaya bad ban jur ba ka Sorkar India kan iai bteng ban ai jingkyrshan sha ka roi ka par lyngba ki jingtei bad ka jingialong kawei ha ka thain Shatei Lam Mihngi.
Ula iaroh ia u Conrad K Sangma halor ka jingkiew sted ka Meghalaya, haba batai ia ka kum ka Jylla ba kiew sted eh hapoh ka Ri da ka jingkiew ba kot 13-14% bad ka ioh ka kot ba arshah hapoh ka san snem.
Haba shim ia ka thain Shatei Lam Mihngi kum ka ‘Ashtalakshmi”, ula ong ba ka thain ka don hapdeng eh jong ka thong ka roi ka par ka Ri India bad ula kdew ia ka Meghalaya bad ka Shillong kum ki jaka kiba dang kiew ha ka liang ka jingdon ia ki jingtei, ka jingkynshew kam, ka kam jngohkai bad ka sengkam sengjam.
Kiwei pat kiba la ai jingkren ki long u Avinash Joshi, IAS, Secretary, Ministry of Food Processing Industries , ka Sorkar India, u Sanjay Goyal, IAS, Commissioner & Secretary, ka Sorkar Meghalaya bad Chair, Organising Committee, NEIINFRA, bad u Bajrang Lohia, President, FINER.
