Shillong, Jymmang 16: U Chief Electoral Officer (CEO), Meghalaya, Dr. B.D.R. Tiwari, ha ka sngi Thohdieng u la ong ba ka jylla ka la long kaba la khreh na ka bynta ka Special Intensive Revision (SIR) ka ban wan ia ki electoral roll kumba la pynbna da ka Election Commission of India.
U la ong ia kane ha ka jingiakren bad ki lad pathai khubor ha Shillong ban ai jingtip ia ki shaphang ka por, ka rukom treikam bad ka rukom pynkhreh na ka bynta kane ka kam ha kylleng ka jylla.
Ha kane ka jingiakren, u Dr. Tiwari u la pyntip ba ka Election Commission of India ka la pynbna ia ka bynta kaba lai jong ka Special Intensive Revision na ka bynta ki jylla bad ki Union Territory ba dang sah ba kynthup lang ia ka Meghalaya. Ka tarik ban treikam na ka bynta kane ka kam ha Meghalaya kan long ha ka 1 tarik u Risaw, 2026.
U la ong ba ka jingpynkhreh kam, ba kynthup ia ki prokram ai jinghikai bad ka jingshon ia ki kot lum jingtip kin long naduh ka 20 tarik haduh 29 tarik u Jylliew, 2026.
Ka khana samari ha ki iing ka ban leh da ki Booth Level Officer (BLO) kan long ha ka 30 tarik u Jylliew haduh ka 29 tarik u Naitung, 2026, ha baroh ki polling station ha kylleng ka jylla. Yn pyndep ia kane ka kam ha ka 29 tarik u Naitung, 2026.
U Dr. Tiwari u la pyntip ba yn pynmih ia ka draft electoral roll ha ka 5 tarik u Nailar, 2026, bad hadien kane, ka kam ban pan jingpynbeit kan bteng haduh ka 4 tarik u Nailur, 2026. Ia ka electoral roll kaba khatduh yn pynmih ha ka 7 tarik u Risaw, 2026, hadien ba la dep lut ka kam.
Ha kaba kren shaphang ka jingkhreh ki kam na ka bynta kane, u CEO u la ong ba la shim lut ia ki sinejam katkum ki rukom treikam jong ka Election Commission of India ban pynthikna ia ka jingiaid beit ka kam Special Intensive Revision ha kylleng ka Meghalaya.
U Dr. Tiwari u la pyntip ruh ba la pyndep ia ki jingiakynduh bad ki jingiamir jingmut bad ki seng sain pyrthei ha ka jylla, ha kaba la batai bniah shaphang ki kam kiba iadei bad ka Special Intensive Revision. La ai jubab ruh ia ki jingkylli bad ki jingsngew jong ki nongmihkhmat na kine ki seng sain pyrthei ha kine ki jingiakren.
La kyntu ruh ia ki seng sain pyrthei ba kin buh ia ki Booth Level Agent (BLA) jong ki ban pynthikna ia ka jingiaid beit iaid ryntih kane ka kam ha ki shnong. U CEO u la ong ba ki BLA ki don ka bynta kaba heh ha ka jingai jingiarap ia ki Booth Level Officer ha kane ka kam ha man ki polling station.
Da kaba ban jur halor ka jingkut jingmut Election Commission ban pynthikna ia ka kam elekshon kaba laitluid, kaba hok bad kaba shai, u Dr. Tiwari u la ong ba ia ka Special Intensive Revision yn leh ha ka rukom kaba shai da ka jingthmu ban pynthikna ban don ki electoral roll kiba beit, kiba kynthup lang ia baroh bad kiba lait na ki jingbakla ha ka jylla.
