Shillong, Jymmang 16: Ka bynta ba nyngkong jong ki kam ba iadei bad ka Khana samari 2027 ha Meghalaya kan sdang naduh ka 16 tarik u Jymmang 2026, da kaba sdang ïa ki kam lum jingtip na ki iing ha kylleng ka jylla.
Kane ka kam ka ban long baroh shi bnai kan bteng haduh ka 14 tarik Jylliew, 2026, kaba kynthup ia baroh 12 tylli ki district jong ka jylla Meghalaya lyngba ka rukom lum jingtip da ka lad digital.
La pynlong ia ka jingialang bad ki lad pathai khubor mynta ka sngi ha Shillong Press Club da ka Press Information Bureau, Shillong ha ka jingiatreilang bad ka Tnad Census Operations, Meghalaya ban ai jingtip ia ki nongthoh khubor halor ka rukom treikam, ki lad pynkhreh, ka rukom treikam digital, bad ka jingiaid shaphrang jong ki kam ai jingkhein hi dalade kiba dang iaid shakhmat.
Ha kane ka jingialang bad ki nongthoh khubor la ai jingkren da u Biswajit Pegu uba dei u Director ka Census Operations, Meghalaya, Sorkar India.
Kiwei pat ki heh ophisar kiba la don lang ki kynthup ïa u Subhashish Chatterjee, Joint Director; u B. Basumatary, Deputy Director; bad Bah Aibor Sanglyne, Deputy Director from the Tnad Census Operations, Meghalaya. Ia kane ka prokram la pyniaid da u Gopajit Das, Assistant Director, PIB Shillong.
Haba ai jingkren sha ki lad pathai khubor, u Biswajit Pegu u la pyntip ba la thung haduh 8,309 ngut ki Nongshim jingkhein bad ki Nongpeit kam ha kylleng ka jylla Meghalaya na ka bynta ban pynlong ïa ka jinglum jingtip na ki iing. Baroh ki don 9,950 tylli ki House Listing Block (HLB) kiba la pyndep ha kylleng ka jylla na ka bynta ki kam ba iadei bad ka Khana samari 2027.
U la ong ba ka bynta jong ka jinglum jingtip na ki iing kalong ka nongrim jong ka kam khana samari baroh kawei bad yn lum ïa ki jingtip kiba ïadei bad ka jinglong jingman jong ki ïing, ki tyllong um dih, ki kam pynkhuid, ki jingdonkam ha ïing, bad ki jingdon jingem.
Ki nongshim jingkhein kin leit jngoh ia man la ka iing bad ka longiing ha ka kam kaba 30 sngi ban pynthikna ia ka jingkhein kaba pura bad kaba thikna.
U Pegu u la pyntip shuh shuh ba ïa ka Khana samari 2027 la pynlong lyngba ka rukom treikam digital. Ki nongshim jingkhein kin lum bad phah ia ki jingtip beit beit lyngba ka Mobile Application da kaba pyndonkam ia ki smartphone jong ki hapoh ka kam “Bring Your Own Device” (BYOD).
La khmih lynti ba ka rukom treikam digital kan kyntiew ia ka jinglong thikna jong ki jingtip, pynduna ia ki jingbakla, bad plie lad ban peit bniah ha ka por ia ki kam.
Ka Tnad ka la pyntip ruh ba ka jylla Meghalaya ka la lah ban pyndep 100 percent ia ka Geo-tagging bad ka jingpynbeit pud ia baroh ki House Listing Block ha baroh kawei ka jylla ha ka por ba dang pynkhreh.
Ka kam ka kynthup ia baroh 12 tylli ki distrik, 7428 tylli ki shnong, bad 9 tylli ki shnong, kaba pynthikna ia ka jingpynkhreh kaba pura na ka bynta ban sdang ia ki kam. Katba ka East Khasi Hills ka la don bun eh ki HLB haduh 2,159, bud sa ka West Garo Hills kaba don 1,488.
Halor ka rukom ai jingkheiñ hi dalade, ki heh ophisar ki la pyntip ba ka bynta jong ka jingai jingkheiñ hi dalade lyngba ka lad online, kaba la sdang naduh ka 1 tarik u Jymmang, 2026, kan kut noh ha ka por shiteng miet mynta ka sngi. Ki nongshong shnong ki la lah ban pynpoi ïa ki jingtip ba bniah jong ki ïing ki sem jong ki lyngba ka lad digital ha rynsan Self-Enumeration.
Ki heh ophisar ki la ong ba ka Meghalaya ka la sakhi ïa ka jingpynshlur ïa ki paidbah ban ïashim bynta ha kane ka kam, ha kaba ka West Khasi Hills kadei ka jylla kaba bun tam ki nongai jingkhein hi dalade, bud sa ka East Khasi Hills bad ka West Garo Hills.
U Pegu u la pynshai ba ïa ki jingtip ba la ai lyngba ka rynsan Self-Enumeration yn pynshisha da ki Nongshim jingkheiñ ha ka por ba ki leit sha man la ki ïing, bad tang ïa ki jingtip ba la pynshisha yn upload lyngba ka HLO application.
Ki heh ophisar ki la pyntip shuh shuh ba la ai jinghikai ia ki Nongshim jingkhein bad ki Nongpeit kam halor ki jingmut jong ka khana samari, ki rukom treikam, bad ka jingpyndonkam ia ki digital application na ka bynta ban lum jingtip kaba thikna.
Ha ki sngi ba nyngkong jong ka jingtreikam, ki nongshim jingkhein kin pynshisha ia ki pud jong ki House Listing Block, ban ithuh ia ki jaka, ban pynkhreh ia ki map bad ban ai nombar ia ki iing shwa ban sdang ban lum jingtip ia ki iing.
Ka Tnad ka la ban jur ba la buh ia ka rukom pynthikna kaba khlain, kynthup ia ka jingpeit bniah ha ka por, ki jingjurip ia ki jaka, bad ka jingpynshisha biang ha kano kano ka jaka kaba donkam. La pyntreikam ruh ia ki lad ban lum jingtip offline ha ki jaka ba duna ka network.
Haba kyntu ia ki nongshong shnong ban iatreilang bad ki nongtrei ha ka kam khana samari, u Pegu u la ong ba ka jingiashim bynta jong ki paidbah ka long kaba donkam bha ban pynthikna ia ka khana samari kaba thikna bad kaba kynthup lang ia baroh ka ban kyrshan ia ka jingthmu ha ki por ban wan, ka jingai jingiarap bad ki sienjam ba iadei bad ka roi ka par ha kylleng ka jylla.
