Shillong, Jymmang 21: Ka Nangkiew Irat FC ka la pyllait lut ia baroh ki ktang lyer kiba ka lah ba kan don ei ban pynliem ia ka Langsnbing FC da 3-1, ha ka wat iakhun kaba ar ka quaterfinal ka 5th Meghalaya State League, ba la long hynne ka janmiet ha madan ialehkai ka SSA Satdium, First Ground Polo.
Naka bynta kane ka jingiakhun u bah Khlain Pyrkhat Syiemlieh, Coach ka Langsning FC, u la pynshong ben shwa ia ki rang ialehkai ba paw bad ba kynsai ki jong, hynrei, marsien iohi ia ka sur bad ka rukom ialehkai ka Nangkiew Irat FC wut wut u la phah pynsyiad met (warm-up) ia ki, bad ka jingbujli ia ki player ka dang iai bteng wat haduh ba la iakhun ia ka kylla miet, pynban kane ka buit kam shim la lah ban khanglad ia ka kynhun ka jong u ba kan mad iaka namrem, kaba dei ka namrem ba nyngkong ia ka kynhun ha kane ka lympung iakhun.
U namtam ha kane ka janmiet jong ka jingiakhun dei u Wallamsuk Nongkhlaw (25’P) ia kaba ka Langsning FC ka la ioh ia ka kabu ba kan pynphai kylla pat ia ka da u Kyrmenskhem Mukhim (42′).
Haba wan ban bteng ia ka kylla miet sa shisien u Wallamsuk Nongkhlaw (50) ula ioh ba un thep ia ka kol kaba ar bad ka kol kaba lai la ioh ban thep da u Justerwell Tham (81′), kaba pynlong ia ka Langsning ba kan nym lah shuh ban lah ban kynjoh ia ka thong ban jop ia kane ka jingiakhun.
Kumban shu pynkynmaw ba ha ka wat ba nyngkong ka Langsning FC ka la lah ba kan jop da 6-1 ia ka ia ka Nangkiew Irat FC
Ha shwa jong kane ka jingiakhun, ki lai kol lyngba u Iaishah Bareh (3′, 52′, 75′) bad bynrap lang sa ki kol na u Hesmiki Rymbai (19′, 90’+5), u Niponghi Sumer (20′) ka la biang pura ia ka kynhun ialehkai ka Rymbai Shkenshynriah SC ban pynliem ia ka Maram FC da 6-2.
Ia ki artylli ki kol naka bynta ka Maram FC la thep ia ki da u Seiborlang Tado (53′) bad Santosh Teron (77′).
Haba phai sha kane ka jingiakhun, tang hapoh 20 minit ka Shkenshynriah ka la lah ba kan ioh ban thep haduh lai tylli ki kol, hynrei katba nang iaid shakhmat ka Rymbai Shkenshynriah SC ba kan tehlakam ia ka jingiakhun tad haduh ba kan da lah ba kan khur artad ia ka jingjop.
Kumta ha kaba kut jong kine ki jingiakhun, haba phai pat sha ka miej iakhein point, ka Langsning FC ba kan iai neh ha ka kyrdan ba nyngkong hadien ba ka la lah ban khur 9 point, ryngkat bad ka Shkenshynriah, kaba ka jingiapher hangne ka long ha ka head-to-head, katba ka Nangkiew Irat kan don haka kyrdan kaba lai hadien baka la ioh ba kan khur 6 point, ka Maram FC pat 0 point.
Lashai pat ka sngi ka jingiakhun kan dei biang pat jong ka Group A ka Nongkseh SSCC kan iakhun ia ka Rangdajied United FC ha ka por 2 baje nohphai sngi, bad bynrap da ka jingiakhun hapdeng ka Shillong Lajong FC pyrshah ia ka Mawlai SC kaban long ha ka por 6 baje janmiet, ka jingiakhun kaba ki ar kynhun ki donkam ia ka jingjop ban ioh bat ia ka kyrdan kaba ar.
