Tura, Jymmang 21: U Myntri Rangbah ka Jylla Conrad K Sangma mynta ka sngi ula ia shim bynta ha ka SSP-CO’sConference 2026 kaba la pynlong ha Tree Houde, West Garo Hills Tura, ha kaba ki nongialam ba hakhlieh duh bad ki Field Officer ka Tnad Meghalaya Police kila ialum lang ban iakren sani halor ki jingtreikam ba paka, ka jingpynkylla ha ka rukom pyniaid kam, ka jingtehlakam ia ka ain bad ka shongsuk shongsain, bad jingpynkhlain ia ki jingtei jong ka tnad.
Ka conference kala sdang da ka jingpynkup burom ia ki heh ki hain bad la ai ia ka jingkren pdiang sngewbha da u A Goenka, Inspector General of Police (CID), Meghalaya. La pynbud ia kane da ka jingpynlait ia ka Training Manual bad ki jingai jingkren kiba long halor ki mat ba kongsan jong ka kam Pulit bad jingpyniaid ia ka Tnad.
Ka Director General of Police Kong I Nongrang kala ai jingkren halor ki rai bala shim da ka DGsP/IGsP Conference 2025, bud da ka Action Taken Report halor ka SSP-CO Conference jong u snem bala lah da u JG Momin, Deputy Inspector General of Police (A) Meghalaya Shillong. La ai jingkren ruhn halor ka Law and Order, ka PIMS bad ka Complaint Management System ba kynthup ia ka CM Connect, 1930 Cyber Helpline, CCTNS bad kiwei kiwei.
Haba ai jingkren, u Myntri Rangbah Conrad K Sangm aula pynpaw ba ka jingpynlong thikna ia ka SSP-Cos Conference ka pyni ia ka jingnang janai ha ka rukom treikam ka Tnad bad ai khublei ia ka Director General of Police ba kala shimkhia ban pynthikna ba kum kane ka conference kala long man ka por. Ula pynpaw ba ki jingbym don ki jingialang ba thikna ha kine ki snem bala leit kala wanrah ia ka jingbym biang ha ka rukom iatreikam lang hapoh ka Tnad. “Kane ka dei ka sienjam kaba bha palat. Sa shisien, Nga kwah ban ai khublei ia ka DGP ba kala lah ban pynurlong ia kane bad ai khublei ruh ia baroh kiba wan ban iashimbynta” ula ong.
Haba pdiang ia ki nongwan iashimbynta sha ka conference, ula pynshai ba ka jingjied ia ka jaka ka long shibynta jong ka jingtmu ban bujli ia ka jaka pynlong ia kum kine ki conference ha kylleng ki jaka hapoh ka Jylla, haba bynrap ba kane ka dei ban long ka rukom leh kaban long man ka por ha ki snem ban wan. “Nga kyrshan pura ba ha ki snem ban wan, ngi lah ban pynlong ia ka coference ha ki jaka kum ha Jowai lane Nongstoin lane ha kano kano ka jaka dakaba bujli na kawei ka jaka sha kawei pat” ula ong.
Haba kren halor ka jingkongsan ban pynlong ia ki conference, u Myntri Rangbah ula ong ba ka jingthmu ba hakhmat eh ka long ban ai ka rynsan kaba ki Ophisar ki lah ban pynsngew kat kaba don halor ki jingeh bad ki jingtynjuh ba ki mad. Ula ban jur ba ki lad ki lynti ban weng ia ki jingeh ki mih tang haba wanrah ia ki jingeh bad iakren ha ka lynti kaba dei. “Ka bynta ba hyngkong ka long ban ai ka rynsan ban lah iakren markhmat ia kiei kiei baroh. Kane hi ka dei ka jingsdang ban iawad ia ki lad ki lynti” ula ong.
Haba kdew ia ki katto katne ki mat bala pynsngew ha ka jingai jingkren ki Ophisar, ba kynthup ia ki kam ba iadei bad ka NPS, ula pynpaw ba katto katne ki jingsngewkhia ym pat shym la wanrah sha ka Sorkar watla ki long kiba la slem bha. “Wat ha kine ki phra snem kum u Myntri Rangbah, Ngam pat ju iohsngew ia kane ka jingeh bala pynsngew ha kane ka rukom” ula pynpaw, haba kyntu ia ki Ophisar ban pyndonkam pura ia ka rynsan ban iasam ia baroh ki jingeh kiba la mad da ka Tnad.
U la pynthikna ba watla ym baroh ki mat ki lah ban don ia ki lad ki lynti kiba kloi ban pynbeit, hynrei ka sorkar kan dang ïai bteng ban bishar bad pynbeit ïa ki ha ka rukom kaba la buh ryntih.
U Myntri Rangbah ula bthah ruh ba ia baroh ki jingkren bala pynsngew ha kane ka conference dei ban lum lang bad ban ai sha ka Ophis jong u na ka bynta ban ioh khmih bniah. Ula ai jingmut ruh ban wanrah iaki mat ba kongsan kiba mih na kane ka conference sha ka jingialang bishar kam lang hapdeng u Myntri Rangbah, DGP, ka Tnad kam Pohiing bad u Myntri ba dei khmih khnang ban lah shim rai ha ka por kaba biang.
U Myntri Rangbah ula pynpaw ruh ia ka ingdonkam ki jingai jinghikai ba khlem sangeh, kiba kynthup ia ki bynta jong ka ain bad ka shongsuk shongsain, ka jinghikai halor ka akor ka burom, ka jinglum khubor, bad ka jingpyndonkam ia ki technology. Ula pynshlur ban kynthup ia ki bynta halor ka jinglum jingtip bad ki rukom treikam kiba bha tam ha ki conference ban wan bad ai jingmut ban phah ia ki Ophisar sha kiwei ki Jylla kum sha Mumbai bad Delhi, ba kin ioh jinghikai na ka rukom treikam kaba bha tam jong ki Pulit.
Ia kane ka conference la pynwai da ka jingkren ai khublei khatduh da u DP Marak, Inspector General of Police (SB/Bdr), Meghalaya.
