Shillong,Jylliew 03: Ka North Eastern Council (NEC) kan pynlong ïa ka Plenary Session kaba 73 ha ka 4 tarik Jylliew, 2026 ha Shillong, Meghalaya hapoh ka jingpynïaid jong u Myntri kam pohïing jong ka sorkar pdeng bad u Chairman ka NEC, u Amit Shah.
Ha kane ka jingialang yn iadon lang
u Myntri Sorkar Pdeng ba dei khmih ia ka Tnad Development of North Eastern Region
(DoNER) uba dei ruh u Vice Chairman ka NEC, u Jyotiraditya M. Scindia; u Myntri
Khynnah ba dei khmih ia ka Tnad DoNER, u Dr. Sukanta Majumdar; ki Lat bad ki Myntri
Rangbah jong phra tylli ki jylla ka thain shatei lammihngi; kiwei pat ki Dkhot jong ka
Dorbar; bad ki heh ophisar jong ka sorkar pdeng bad ki sorkar jylla.
Ka jingïalang shwa ka Plenary ban ïakren halor ki sienjam ba kongsan kum ki kam ba iadei bad ki siej, Agarwood, bad Ashtalakshmi Darshan, bad kiwei kiwei ki mat kan long ha ka 3 tarik Jylliew, 2026.
Ha kane ka jingïalang yn ïashim bynta da u Secretary, MDoNER bad ki Chief Secretary jong phra tylli ki jylla ka thain shatei lammihngi, Secretary, NEC lem bad ki
heh ophisar jong ka Tnad DoNER, NEC, ki sorkar jylla bad kiwei kiwei ki Tnad Sorkar
Pdeng.
Ka North Eastern Council, kaba la sdang hapoh ka North Eastern Council Act, 1971, kalong kum ka kynhun pynkhreh kam kaba heh tam ha ka thain na ka bynta ka thain shatei lammihngi bad ka don ka bynta kaba kongsan ha kaba kyntiew ia ka roi ka par kaba ryntih bad pynkhlain ia ka bor jong ka synshar paidbah kaba iatreilang ha ka thain. Ka Plenary session ha ka 4 tarik Jylliew, 2026 kan iakren bad pyrkhat sani halor ka jingiaid shaphrang jong ki CM High-Level Task Force ba la sdang na ka bynta ki kam kiba kongsan jong ka roi ka par ha ka thain. Yn ai ia ki jingbatai shaphang ka kam jngohkai pyrthei; Ka rep ka riang bad ka kam Horticulture; ka Jingkyntiew ia ka jingbei tyngka; ka Jinglah kyrshan dalade ha ka kam ba iadei bad ka Dud, ki pylleng, ka Dohkha, bad ka Doh; ka jingkyntiew ia ka kam ialehkai; ka jingkyntiew ia ki lad ka ioh ka kot; ki jingdon jingem bad jingpyniasoh;
bad ka jingthain jain bad jingtrei kti.
La khmih lynti ba ki jingiakren kin pynsuk ia ka jingtreikam kaba iatreilang hapdeng ki Jylla bad kito kiba don bynta ha kane ka kam na ka bynta ban pynurlong ia ki thong na ka bynta ka roi ka par.
Ka jingialang kan peit bniah ruh ia ki sienjam ba kongsan jong ka Tnad DoNER, kynthup ia
ki jingpynbna halor ki skhim bad ki prokram ba kongsan, ki jingmih na ka North East
Investment Summit bad ka Bankers’ Conclave, ki sienjam ba iadei bad ki samla, bad ki jingpyrshang kiba iadei bad ka kam jngohkai pyrthei, ka jingpynpoi mar, bad ki projek Unique Selling Proposition (USP) ha ka thain.
Ha ka Plenary Session yn ïakren ruh shaphang ka North East Vision Plan 2047, kaba thmu ban pynbiang ia ka rukom treikam kaba jrong samoi ban pynkylla ïa ka thaiñ shatei lammihngi sha ka jaka pdeng kaba khlain ha ka jingkiew ka ioh ka kot, ka jingpyniasoh, ka jingsaindur thymmai, ka jinglah ban iaineh, bad ka jingriewspah ka kolshor shuwa ka jingdap shispah snem ka jingïoh laitluid jong ka ri India.
Ki Dkhot jong ka North Eastern Council kin ïasam ruh ïa ki jingmut jong ki halor ki jingthmu pynroi ha ka thaiñ bad ki lad ki lynti ban pynkhlaiñ ïa ka jingïatreilang hapdeng ki jylla.
Ka dur jong ka Plenary kaba 72 jong ka NEC, kaba la long ha Agartala ha ka 21 tarik
Nohprah, 2024
