Shillong, Jylliew 04: Ha ka jingialang kaba 73 jong ka North Eastern Council kaba la long ha Shillong mynta ka sngi u myntri rangbah ka jylla u la ai ia ka dorkhas ha u myntri tnad kam poh iing halor ki saw tylli ki mat kiba ha khmat eh kiba kum ka jylla ki donkam.
U myntri rangbah u la iathuh ba ha kane ka dorkhas la kdew shai ban don ia ki lad ki lynti kiba bniah kumno ban khang lad ia ka jingwan rung beain ki briew sha kane ka jylla bad na ka liang ka sorkar ka la kren shai ba kawei na ki lad ban iada kan long kum ka ILp kaba ka iing dorbar kala dep pdiang ha iing dorbar bad kum ka MRSSA khnang ban lah ban khang lad ia ka jingwan rung kyrthep ki briew kiba nabar.
Ha kane ka dorkhas ka sorkar kala dawa ban pynrung ia ka ktien Khasi bad Garo ha ka khyrngit kaba phra ka riti synshar ka Ri India kane ka dei ka jingdawa kaba kongsan kaba kum ka jylla kala buh ia ka jingdawa la slem bah bad ka iing dorbar ruh kala shim ia ka rai haba iadei bad kane ka bynta.
Ha kane ka jingthoh ka sorkar kala pynsngew ha kaba ia dei bad ka jingpynkylla ia ka khyrngit kaba hynriew ka riti synshar ka Ri India, bad la ia tip paidbah ba ka don ka bill haba iadei bad kane bad ka sorkar pdeng kala ia phylliew jingmut bad ki jylla bapher bapher kiba don ia ki District Council na ka liang ka sorkar Meghalaya kala kumtu ia ka sorkar pdeng ba shwa ba kan pynlong ain donkam ban ia kynduh lang ban iamir jingmut bad ka sorkar jylla khnang ba kan wanrah ia ka jingmyntoi ia ki riewlum ka thain shatei lam mihngi ka Ri India.
Kawei pat kaba ka sorkar kala thoh ha ka dorkhas ka long ha kaba ia dei bad ka Foreign Contribution Regulation Act, namar ka sorkar pdeng ka thmu ban pynkylla ia kane ka ain bad katkum ka jingpynkhreh ka long ba kan kthah ia ki kynhun niam khamtam ha kaba iadei bad ka jingdon jingem kum ki jaka ki puta haba iadei bad kane u myntri tnad kam poh iing ka sorkar pdeng u la kwah ban ia kynduh ha nongbah Delhi ban iakren kham bniah halor kine ki bynta.
