Shillong, Jylliew 04: U Myntri rangbah ka jylla u Conrad K. Sangma u la iathuh ba u myntri kam pohiing u Amit Shah bad u DoNER Minister u Jyotiraditya Scindia kila iathuh ha kane ka jingialang jong ka NEC ba la thung ia ka National High Level Task Forces ka ban khlieh da ki myntri rangbah jong ki jylla ha ki sobjek bapher bapher kiba ia dei bad ka thain shatei lam mihngi.
U myntri rangbah u la ai nuksa kum ka Heritage Task Force, Cultural Task Force, Sport Task Force bad baroh kine kila ai ia ka jingbatai mynta ka sngi ba kumno ki jylla kane ka thain shatei lam mihngi kin ia trei lang ba kumno ki lah ban ia shim khia lang ha kino kino ki bynta ha ka jaka ba kin iaid la ka jong ka jong.
U myntri rangbah u la ong ba kum kane ka rukom pyrkhat ka long ka sien kaba nyngkong ba ka NEC kala pynurlong ia kane ka rukom pyrkhat kaba don la bun bun snem, baroh shi katta ka dei tang ka nongbei pisa hynrei mynta kala jam sha kawei pat ka rukom pyrkhat ba kan long ruh ka nongsain dur ha ki polisi treikam na ka bynta ka Northeast.
Na ka liang u myntri rangbah u la ong ba hadien ba la dep ai ia ki kaiphot u kwah ban iohi ban treikam noh hapoh shi snem bad kane ka dei ka jingbthah kaba la bthah da u myntri kam pohiing kam sorkar pdeng bad u myntri ka DoNER bad u khmih lynti ba kan don ka jingkylla bad kan don ka jingiatrei lang hapdeng ki jylla ka thain shatei lam mihngi ha ryngkat ki tnad ka sorkar pdeng ba kin ia trei lang ban poi sha ka thong.
