Shillong,Jylliew 04: Ka jingialang kaba 73 jong ka North Eastern Council kala long mynta ka sngi 04/Jylliew/2026 ha State Convention Centre Shillong ha kaba u shongknor ka NEC u myntri kam pohiing ka Ri India u Amit Shah u la wan ban ia shim bynta ha kane ka jingialang.
Ha kane ka jingialang la don lang ruh u myntri ba dei peit ia ka Ministry Development of North Eastern Region u Jyotiraditya Scindia u lat ka jylla Meghalaya u C.H.Vijaya Shankar u myntri rangbah ka jylla u Conrad K.Sangma u myntri khynnah ka Doner u Sukanto Mazumdar u secretary ka tnad kam pohiing ka sorkar pdeng u Govind Mohan u secretary ka Doner u Sanjay Jaju ha kane ka jingialang la ia shim bynta da u lat, myntri rangbah ka jylla Arunachal Pradesh, Assam, Manipur, Tripura, Mizoram, Nagaland bad Sikkim lem bad ki heh sorkar.
Na ka liang ki pulit kila dep ban pynbna paidbah ba kan don ka jing pynkylla ia ka jingiaid ki kali ha ki surok kiba dei hajan ka State Convention Centre namar ka jingdon jong kane ka jingialang kaba heh ha katei ka jaka namar ki khlieh jong ki jylla bad ki khlieh jong ki sorkar jylla ka thain shatei lam mihngi kila ia don lang ha kane ka jingialang kaba 73 jong ka NEC.
Ha kane ka sngi la iohi ba naduh Mariot Hotel bad ki thain Police Bazar la khang ha kane ka sngi ia ki nongdie madan bad ha Police Bazar ym shym la shah ban ieng kali ia ki heh ki hain bad ha kajuh ka por ia ki kali kamai kiba ju ieng ha police Bazar ban ap ia ki nongleit nongwan bad ha ki thain Polo kala don ka jingia pyni nia hapdeng ki paidbah bad ki pulit.
