Shillong, Jylliew, 19: Ka Meghalaya State Zoo kala sakhi iaka jingwanrah ia u kynja shrieh Macaque ba la tip ha ka ktien phareng bad ha ka Khasi, la tip kum u Shkur ha ka sien nyngkong bala pynkha ha ka jaka peitkai iaki mrad.
La wanrah ia kitei ki shrieh shijur ki kynthei bad shynrang na Aizawl Zoological Park, Mizoram, hapoh ka prokram ia kylliang iaki mrad.
Ka jingwanrah ia kine ki jait shrieh ka long ka jingpeit ba ki lah ban shah jong ki iaka mariang ba thymmai bad ka rukom ban sumar iaki mrad, ka jingkyrshan jong ki doktor mrad bad ka rukom pyniaid da ka nongrim saian ha katei ka jaka peitkai iaki mrad.
Ia kine ki shrieh, la ong ba ki long ki mrad kiba duna bad tlot bor ha ka thup jong ka IUCN bad ki mad iaki jingma na ka jingiehnoh jong ki jaka sah ki mrad ne ki sim, ka jingia pait bad ka jingshah pynthut ha ki briew. Kane ka jingpyn roi kaba jop ia kine ki mrad ka pynioh iaka jingtrei shitom ba bteng ban ai jingiada iaki lyngba ka prokram.
La ong ba kine ki shrieh ba dang shu dep kha ki don ha ka met ba koit ba khiah bad dang peitngor ki doktor mrad jong kane ka jaka peitkai iaki mrad katba ki dang shong hajan lang bad ka kmie bad ka kynhun.
U D. Sathiyan, PCCF (Wildlife & Biodiversity) bad Chief Wildlife Warden, Meghalaya, u la batai ba kane ka prokram ka long kum ka jingpyn shlur kaba la mih na ka jingtrei shitom ba bteng ha kaban ai jingiada iaki mrad ha kane ka jylla.
U la ong ba ka jingkut jingmut na ka liang kane ka jaka ri mrad bad ai jingiada iaki mrad ba shem jingma, ka long ka jingjop iaka jylla Meghalay, ha kajuh ka por ka pynioh iaka jinghusiar bakhraw iaki paidbah shaphang ka jingdonkam jong ki jaka pule shaphang ki mrad ha kaban ai jingiada ia kiba shem jingma bad jingeh na ka bynta ka lawei ki pateng.
