Ampati, Jylliew, 19: Ha ka sngi palei, la sdang iaka prokram ban iada na ka jingpang pynhiar kpoh 2026 ha Balalgre LP School, South West Garo Hills, kaba hap hapoh ka National Health Mission (NHM), Meghalaya.
La sdang ia katei ka prokram da u D. B. G. Momin, uba dei u Additional Deputy Commissioner, South West Garo Hills, ha ka jingiadon lang jong ki heh ka koit ka khiah kane ka district, nongtrei, nongialam ka imlang ka sahlang, nonghikai, samla pule bad ki nongshong shnong.
Ka jingthmu jong kane ka prokram ka dei halor ka jinghusiar ban iada na ka jingpynhiar kpoh, khamtam hapdeng ki khynnah, ka jingiashim bynta lang ki nongshong shnong, kham pynbiang iaka jingleh khuid bad ioh ka jingsumar ha ka por ba biang.
Ha kane ka prokram jingialang, u D. B. G. Momin u la iaroh iaka jingtrei shitom jong ka tnad ka koit ka khiah ha kaban pynlong kane ka prokram bad ban jur iaka jingdonkam jong ka jingshim khia ka bor imlang sahlang ha kaban pyn shlur iaki rukom im kiba koit ba khiah bad ai ki lad ban iada kiba pyn myntoi ban ai jingiada iaka koit ka khiah jong ki khynnah bad ki riew paidbah kiba shem jingeh.
Haba kren ha kane ka prokram, ka Dr. Noreen Sangma, kaba dei ka District Maternal bad Child Health Officer (DMCHO), kala ban jur halor ka jingdonkam ka jingleh khuid bad ban dih iaka um ba la dep shet khnang ban lait na ka pynhiar kpoh.
Ka la ong ruh ba donkam ban sait iaki kti da ka sabon, ka jingleh khuid leh suba, ka rukom sait khuid iaki jhur ka bam ka dih bad ka jingdih ia u Oral Rehydration Solution (ORS) bad ki dawai Zinc na ka bynta ban teh lakam iaka jingpyn hiar kpoh.
Ha kaba iadei bad kane ka prokram, la pynlong iaka jingleh iaki test ha katei ka shnong iaki nongshong shnong bad la don baroh haduh 147 ngut ki nongioh jingmyntoi, kynthup ia 100 ngut kiba la heh la san, 28 ngut ki tymmen bad 19 ngut ki khynnah.
Kane ka jingleh test kala ai bun ki bynta jong ka jingsumar iaka koit ka khiah kynthup iaki jingshem iaka koit ka khiah baroh kawei, test iaki khmat bad kiwei kiwei bad ka jingsam iaki dawai dashin ba kongsan. La pyn iasoh ia u Aadhaar bad MHIS na ka bynta ki nongioh jingmyntoi.
Kane ka prokram ka kynthup ruh iaki jingialang pynshai bad ka jingpynpaw kaba shai halor ka rukom sait kti kaba biang ban kyntu iaka rukom im kaba koit kaba khiah hapdeng ki khynnah skul bad ki nongshong shnong.
Ka sngi kaba kmen ka la sakhi iaka jingdon bynta shit rhem na ka paidbah bad kala poi sha ka jingkut kaba jop ryngkat ka jingkular lang ban pynbha iaka koit ka khiah ka imlang sahlang bad ban pynduna iaka jingeh na ki jingshitom iap pdum hapoh ka distrik.
