Delhi, Jylliew, 22: Na ka bynta ka jingsuk ki nongleit nongwan bad pynkhlain iaka jingdon jong ki jingdonkam ha ki surok bah ki paidbah bad ka surok ba stet tam, ka National Highways Logistics Management Limited (NHLML), kaba dei ka kompeni jong ka National Highways Authority of India (NHAI).
Kane ka kompeni kala bthah ia ka ophis treikam jong ki ban pynkyntu iaki nongwai ia kiba shim ia ki jaka shongthait ba kin pynkhreh kloi iaki jaka shna kali bad ki jaka shna tyre khnang ba ki nongleitkai kin nym iakynduh jingeh haba ki kali ki sniew ha surok bah.
Kane ka jingpyntreikam ka thmu ban kham pynbit pynbiang iaki surok bah na ka bynta jong ki nongleit nongwan, pynsuk ka leit ka wan, jingiada na ka jingshitom bad ki aksiden kumjuh ruh ioh iaka jingiarap kaba kloi ha ki por ba donkam kyrkieh ha ki surok bah.
Ka National Highways Authority of India (NHAI) ka khein kordor bha ban pynbit pynbiang iaki jaka shna kali bad ki jaka suh tyndong ha ki jaka shongthait kiba don ha rud surok bah ban kyntiew iaka jingsuk jong ki nongleitkai, ban pynduna iaka jingslem ha ka leit ka wan, bad ban pynthikna iaka jingshong khjai ha ki por ba kynduh jingeh.
Kine ki jaka sah shnong ki long kiba la thew ban ai ki jaka pynbiang kam ba kynthup iaki jingdonkam jong ki nongleitkai bad ki nongniah kali kit mar ha ki surok bah bad surok ba stet tam.
Ka jingtei ia kine ki jaka kan pynbiang iaka thong ban pynlong iaki surok bah National Highway kiba kynjoh kyrdan pyrthei bad ban pynsuk iaka jingleit jingwan jong ki paidbah. Ka jingleit kaba jem, kaba neh, bad kaba lait na ki jingpud jingkah bym donkam lane ka jingduna ha ki jingiarap ba kongsan.
Ka jingthmu jong ka NHAI ka long ba ka kular ban tei iaki surok bah kiba shngain bad kiba peit bniah iaki nongleit nongwan kiba kyntiew iaka ioh ka kot, ha ka juh ka por ba ki pynbiang iaki jingdonkam jong ki nongleit bad ki nongkit mar ha baroh ka ri.
