Shillong, Naitung 01: U Myntri Rangbah Conrad K Sangma mynta ka sngi ula ban biang ba ka synshar khadar ka dei haba kut ban shakri ia ki paidbah, haba pynpaw ba ka roi ka par ka don jingmut tang lada ka kyntiew ia ka jingim ki nongshongshnong.
Ula pynpaw ia kane haba ai jingkren ha ka jingialang pyndon burom bala pynlong da ka Joint Action Committee ban ai khublei ia ka One-Time Settlement (OTS) scjeme ka Sorkar na ka bynta ki kali kamai.
Ha kane ka jingialang, ki nongpyniaid kila pyndon burom ia u Myntri Rangbah lem bad ki Symbud Myntri Rangbah Bah Prestone Tynsong bad Bah Sniawbhalang Dhar kum ka jingithuh ia ka bynta ba kila leh ha kaban pyntreikam ia kane ka skhim.
Haba ai jingkren, u Myntri Rangbah ula pynpaw ba watla ki riew sain pyrthei ki ju bunsien ki shah pynrem haba ym lah pynurlong ia ki jingkhmih lynti, ka jingai jingiaroh ia ki rai kiba pynmyntoi ia ki jingim ka long kaba niar bha.
“Haba don ki jingeh, ki riew sain pyrthei la i kum ki nongshun bah, Hynrei haba lah ban pynbeit ia kiei kiei, kham niar ba kan don ka jingithuh. Ta ka daw ba kane ka jingpyndon burom ka don jingmut bha ia ngi” ula ong.
Haba ban jur ia ka jingmut jong ka Sorkar, u Conrad ula ong ba ka roi ka par kam kut tang ha ki project jingtei kiba heh hynrei ka dei ban iaid ryngkat ryngkat bad ka jingkyntiew ia ka jingim ki nongshongshnong.
“Ha ngi, ka roi ka par kam dei tang halor ki surok kiba heh, ki jingtei, lane stadium. Man ki rai ki dei ban long kiba ktah shisha ia ka jingim ki briew jong ngi. Kane ka dei ka jingthew ba shisha ia ka synshar khadar” ula bynrap.
Haba pynpaw ia ka jingkongsan ka OTS cheme, u Myntri Rangbah ula ong ba ka Sorkar kala shim ia ka rai kaba khraw bad ba eh bha ban map noh na kumba T.850 klur sha ka T.1000 klur, haba buh hakhmat ia ka bha ka miat jong ki hajar tylli ki longiing haba pyrshah ia ka ioh ka kot jong ki.
“Kane kam dei ka rai kaba suk. Kane ka pisa ka dei kaba lah ban pyndonkam sha kiwei pat ki kam. Hynrei ngi sngewthuh ba kumba 16,000 ngut ki nongniah trok bad ki bahaiing jong ki, kumba 2 lak ngut ki briew kin shah ktah beit beit ha ka. Ngi la shim ia kane ka rai haba buh ia kane ka bynta ha ka jingmut jingpyrkhat” ula ong.
Haba jubab ia ki nongkynthoh pyrshah kiba kynnoh ba ka Sorkar kala pynleit jingmut tang ia ki project kiba heh, u Conrad ula ong ba kum kine jingiohi ki pyni tang ia ka dur ba shiliang.
“Hooid, ngi la kynshew ha ki jingtei kiba heh. Hynrei ngi la kut jingmut lang kumjuh sha ki rai kiba buh hakhmat ia u paidbah, la ka long ka jingpynbeit ia ki jingeh bala slem jong ki nonghikai, ka jingkyrshan ia ki nongrep lane ban pynkup bor ia ki nongsengkam sengjam” ula ong.
U Myntri Rangbah ula pynpaw baka synshar khadar kaba lah ban wanrah jingkylla ka donkam ia ki jingtei kiba heh bad ka jingirap ia ki paidbah nongshongshnong.
“Ki project bah eh ki phah ia ka khubor ba ka Meghalaya ka long kaba la khreh bad kaba lah. Hynrei ka jingjop ba shisha ka shong ba kumno kine ki sienjam ki kyntiew ia ka jingim ba manla ka sngi u paidbah”.
Ula ai jingiaroh ia ka bynta jong u Symbud Myntri Rangbah Bah Prestone Tynsong ban jop ia ki jingeh jong ki nongniah kali kamai bad ban wanrah ia kane ka jingtyrwa.
Haba khot ia ka jingkitkhlieh lang jong baroh, u Conrad ula kyntu ia ki kynhun ba don bynta ban iatreilang ha kaban pynthikna ia ka jinglah pyndonkam bha ia ka pisa bad kiar na ki jingpynsah teng ki jingsiew, haba kular ba ka Sorkar kan iai bteng ban pynkhlain ia ka rukom treikam bad jingpyniaid ia ki kam.
“Ngi dei kiba biang lut, hynrei ngi la kut jingmut ban shim ia ki jinghikai, pynjanai bad buh ia ki paidbah hapdeng eh jong man ki rai. Da ka jingkyrshan ki nongshong shnong jong ngi, ngin iai bteng ban pyntyllun shakhmat ia ka Jylla” ula ong.
