Shillong, Naitung 01: Ka ophis jong u Chief Electoral Officer jong ka jylla Meghalaya u la sdang ia ka jingpyntrei kam ia ka Special Intensive Revision (SIR), 2026 katkum ka jingbthah ka Election Commission jong ka Ri India. Ka jingthmu jong kane ka SIR ka long ban pynthikna kito kiba dei hok kim dei ban duh ban rung kyrteng ha ka bui thep vote ka Electoral Roll.
Kum ka jingsdang ia ka jingpyntrei kam ia ka SIR ki Booth Level Officers (BLOs) kila sdang ban leit na kawei ka iing sha kawei pat naduh ka 30/6/2026 ban sam ia ki phom pynrung kyrteng bad ban pynshisha ia ka jingdon kyrteng ba ki dei ki nongthep vote.
Baroh ki BLOs ki don 3,551 ngut kiba la phah ia ki ha kylleng ki bynta jong ka jylla na ka bynta kane ka SIR, 2026, nalor kitei la buh 60 ngut ki Electoral Registration Officers (EROs), 166 ngut Assistant Electoral Registration Officers (AEROs), bad 410 BLO ki ban long ki nongpeit kiba la shah hikai ha kane ka jylla Meghalaya.
Ka jylla ka don 23,49,645 ki nongthep vote bad u wei u wei uBLO u peit iaki 662 ngut ki nongthep vote bad mynta la sam 119,129 ki phom pynrung kyrteng ban kot na ka bynta ki 5.07% ki nongthep vote.
Ka jingsam ia ki phom kaba bun eh dei ha South West Garo Hills 20.49%, North Garo Hills 10.25%, South Garo Hills 6.67%, bad West Garo Hills 6.5%. Ha East Khasi Hills, kaba bun eh ki nongthep vote la sam 28,006 ki phom pynrung kyrteng kaba dei tang 4.43% na ki nongthep vote haduh mynta ka sngi 1/Naitung/2026.
