Shillong, Naitung 09: Mynta ka sngi ka Khasi Student’s Union kala leit ban khang ia ka ophis jong ka Indian Council of Agricultural Research (ICAR) ha Umiam Ri Bhoi District namar ba ka plie mynta ka sngi ba don ka jinglehniam beh Deinkhlam ha Jowai.
Ha kane ka sngi ka KSU kala leit ha ophis trei kam u Director ka ICAR Ri Bhoi District ban kyntu ba u dei ban burom ia kane ka sngi da kaba ai shuti ia baroh kiba wan pule bad kumjuh iaki nongtrei.
Haka ka jaka ba u Director un ai ka jingiatreilang u kren pyneh iaki dkhot jong ka KSU bad kala mih ka jingiabun ktien bha hapdeng u Director ka ICAR Umiam bad ki dkhot jong ka seng.
Namar ka jingbym sngap ia ka jingkren jong ka KSU ba dei ban khang ia ka ophis trei kam mynta ka sngi namar ka dei ka sngi lehniam beh Deinkhlam ha Jowai na ka liang jong ka seng kam don lynti da kumwei kila phah mih sha bar ia u Director bad khang tala ia ka ophis.
Na ka liang ka seng ka kyntu ia baroh ki ophis sorkar kiba don ha kane ka jylla haba don ki sngi kyrpang ha kane ka jylla ki dei ban burom ia ki briew jong kane ka jylla namar ba ka jaka trei kam jong ki, ki don ha Meghalaya.
Ia kane ka jingleit khang ia ka ophis jong ka ICAR la ialam da u Samla Baiashanlang Kharshonlor u ba bat iaka kam kum u Organising Secretary, u Samla Stevenson Kharkhrang u ba bat kum u Assistant Secretary ka KSU North Khasi Hills District bad kiwei kiwei ki dkhot.
