Shillong, Naitung, 09: Ka party Hill State People Democratic Party (HSPDP) ha kane ka elekshon MP Lok Sabha shiteng samoi na ka 1-Shillong Parliamentary (ST) Constituency kan nym kyrshan iano iano hynrei kum ka party kan shong pdeng kaba la tip ha ka ktien nongwei ban shong ‘Neutral’.
U President ka party HSPDP u bah K.P. Pangniang u la ong ba ka Regional Democratic Alliance (RDA) ka dang don hynrei ha kane ka elekshon MP Lok Sabha shiteng samoi ka party kala rai ban shong pdeng bad kala ai iaka mon laitluid iaki dkhot jong ka party ban kyrshan katkum ka jingsngew bit ka jong ki.
Haba jubab iaki jingkylli u President u la ong ba kum ka party hadien ka jingiashong pyrkhat la shim iaka rai ba kin shong pdeng ha kane ka elekshon MP Lok Sabha shiteng samoi kaba mynta ha ka jingshisha, ka party ka don ka jingthmu ban don la u jong u kyrtong hynrei na ka jingthmit ka por ym lah shuh ban buh kyrtong kumta la shim iaka rai ban shong pdeng ha kane ka elekshon MP Lok Sabha.
Ka dei ka jingshisha ba ha ki elekshon ba la dep kum ka party kala kyrshan ia u kyrtong ka party UDP ha ka lama jong ka RDA bad kane ka kynhun ka dang don hynrei hadien ka jingiakren hapoh ka party la hap ban shim iaka rai ba ha kane ka elekshon MP ba mynta la shim iaka rai ban shong pdeng.
