Shillong, Naitung, 09: U President jong ka Hill State People Democratic Party (HSPDP), u bah K.P. Pangniang u la ong ba ka party ka ieng skhem ha kajuh ka nongrim ban pyrshah iaka jingtih Uranium ha kane ka jylla Meghalaya bad kane ka jingpyrshah kala long naduh ka por u President ba nyngkong u bah Hopingstone Lyngdoh bam kwai ha duwar u blei.
Haba kren ha ki lad pathai khubor, ha ophis treikam jong ka party kaba don ha Bomfyle Road, Laitumkhrah u la ong ba ka jingmih ha ki lad pathai khubor ha kine ki khyndiat sngi ha kaba iadei bad u Uranium na ka liang ka party ka kren shai ba ka pyrshah lada don kum kata ka jingthmu.
Ka party HSPDP kala thoh sha ka sorkar na ka por sha ka por ban pynpaw iaka jingpyrshah la don kano kano ka jingthmu ban tih Uranium, ha kaba la dawa ba ka sorkar kala dei ban pynduh pyndam noh iaka rai jong ka kabinet kaba la shim ha ka 24, Nailar, 2009 ban ai wai 422 hektar ka jaka ha South West Khasi Hills District sha ka Uranium Corporation of India Limited (UCIL).
Ha katei ka por ka party kala ai khublei ia u Dr. Mukul Sangma uba dei u Myntri Rangbah ha kato ka por ha kaba ka sorkar kala shim iaka rai ha ka jingialang jong ka kabinet kaba la long ha ka 1/ Nailar/ 2016 ba la pyndam noh iaka rai ai wai jaka sha ka UCIL.
U President u la ong ba ka party ka ai khublei ia u Myntri Rangbah ba mynta, u Conrad K. Sangma uba la pynskhem biang iaka rai jong ka kabinet jong u snem 2016 ban nym shah ban tih Uranium ha kane ka jylla kumba ka party ka ieng skhem ba ka pyrshah iaka jingthmu tih Uranium.
