Ampati, Naitung 9: Ha ka jingbteng jong u lap bah kala pynlong iaki surok ba kin julor bad twa ha ki katto katne ki jaka ha kylleng ka South West Garo Hills district, ha kaba la don ka jingktah ha ka liang ka iaid ka ieng ki paidbah kane ki jaka. Hynrei ka lad pathai khubor ka iathuh ba ym shym la don ba mynsaw, jingiap ki mrad ne julor ki jingthung.
Katkum ka jingiathuh jong ka District Disaster Management Authority (DDMA), ha kaba iadei bad ka jingiaid ha kane ka surok, kala ktah iaka surok Silkona haduh Tikrikilla kaba hap ha Mahendraganj, ka surok Lokaichar haduh Kalaipara bad ka Garobadha haduh Dalu (ba jngai kumba 52) na ka daw jong ka jingjur palat u slap la don ka jingtwa ka khyndew.
Ha kawei pat ka jingjia, la don ka jingtwa surok ha Kotchu Adok kaba dei ka surok ba iaid sha Purakhasia bad Dalu. Kine ki surok kila shah ktah jur na ka daw jong ka jingbteng u lap bah bad donkam mar mar ban maromot ia kane na ka bynta ka jingsuk ki paidbah ha ka leit ka wan.
Ki heh sorkar kila ong ba ka jingdheng kali na ka daw jong kane ka jingtwa khyndew mynta kala biang, ha kaba la shah iaki kali ban iaid, katba ka jingbteng ban maramot iaki surok ba la twa ka dang iaid beit hadien ba la rang u slap.
Ka bor ba dei iaka jinglong ka suinbneng kala pyntip ba ym shym la don ka kaiphod halor ka jingjulor iaka um bam um dih, jingtei lane kino kino ki lad jingiakren tad haduh mynta.
Ka bor ba dei peit kala peitngor bha ia kane ka jingjia lyngba ka 24×7 District Control Room bad dang iatreilang bad ki tnad bapher bapher ha kaban pyn biang ia ka iaid ka ieng ki paidbah katba lah.
Ki nongshong shnong kila shah hukum ban iatreilang bad pyntip mar mar lada don ka jingshlei um, jingtwa khyndew, dheng kali ne kiwei kiwei ki jingjia ba kyrkieh sha ki bor ba dei peit na ka bynta ban ioh kloi ka jingiarap.
