Shillong, Naitung 16: Ka District Medical bad Health Officer, ka East Khasi Hills District, kala pymih da ka jingpynbna halor ka koit ka khiah ki paidbah ba kin sumar bad ban iada ialade na ki jingpang kiba jia man ka por ha kum kane ka por lyiur.
“Ka tnad ka koit ka khiah kala ai jingmut ban sumar ki paidbah ialade na ki jingpang jingshitom kiba kynthup iaka jingpang ba ioh na u kain pyrjong, jingpang shit met, um bam um dih bad kino kino ki jingpang ba ngat na ka jingbam ba ngi bam bad ka jingpang naba bam ia u tit”.
Ki jingiada ki kynthup iaka jingbym dei ban pyllang iaki um hajuh bad sawdong ka iing kynthup iaka tiar jyndiang ba la rim kum ki taiar kali bad ki khiew plastik; da kaba pyndonkam da ki musari lane ki jingtah ban iada na u kain dait bad ban phong da ki sopti ba jrong kti khamtam ha ka por janmiet, dang step bad haba leit iaidkai.
Ban kiar na ka um jaboh lane um shlei, bad lada la ktah ha ka, dei ban sait noh mar mar da ka sabon bad ka um kaba khuid; ban buh bha iaka bam bad buh pynpjah haduh ar kynta bad pynkhuit bha haduh 75℃elcius bad ym dei ban bam iaki jingbam ba la sah ne bym tap bha/
Ban sait khuid iaki kti hashwa ban bam, shet jingshet, hadien ba la dep leit pynjhieh bad hadien ba la ktah iaki mrad; dei ban lehkhuid bad bret lut ki jaboh jabain ba don ha iing khnang ban nym wan khnai, ym dei ban sait iaki jain jong ki nongpang ba shitom pynhiar kpoh hajan ki pung ne wah ne ha ki jaka tong um.
Ym dei ban leit shabar halor riat ne jan bad ki nongbah um, naba ka um slap ka lah ban pynsniew ne pynjakhlia iaka um kaba ngi dih. Ki dei ban kiar na ka ban ri sniang hajan iing shong, lada lah ban leh kumta bad wat bam iaki tit ba long khlaw ne kiba ngim tip.
Ki jingdonkam ban leh hapoh ki skul, ki ophis bad ki jaka pynrit ki kynthup iaka jingpynlong man ka taiew iaki kam ban pynduh jait iaka um kaba lang. Ban pynkhuid iaki phyllaw bad ban bret ne pynduh beit iaki niut ki nier.
Ban pynbiang ka um dih kaba shngain bad ki jaka pynkhuid kiba biang. Ban pyntip mar mar sha ka jaka sumar kaba jan tam haba iohi ba bun briew ki ioh ka jingshit met ne ka pang pynhiar kpoh. Ka jingpynbna ka ong ruh ba bun na ki jingpang kiba wan ha ka por ba thikna lah ban tehlakam da ka jingkhuid ka ba biang, ka mariang kaba khuid, ka jingkiar na ka jingioh pang, bad ka leit shim dawai ha ka por kaba dei.
