Guwahati, Naitung 22:Ha ka jingjia kaba khraw ha ka liang ka jingshngain ka ban wanrah ïa ka juk kaba skhem bad kaba ïadei bad ka roi ka par, la ïoh ïa ka jingkylla kaba khraw ha Manipur. Ha ka 21 tarik Naitung 2026, 46 ngut ki dkhot jong ka Kangleipak Communist Party (People’s War Group) ba la khein beain ki la wan pyndem hakhmat u Myntri Rangbah ka Jylla, u Y. Khemchand Singh, ha Mantripukhri Garrison, HQ Assam Rifles (South) ha Imphal East district.
La sdang ia kane ka jingialang da ka jingdonlang u Myntri ka tnad kam pohiing uba dei ruh u Myntri ka tnad Art & Culture bad Tourism jong ka Sorkar Manipur ha ryngkat ki heh sorkar bad ki heh shipai, kynthup ïa ki MLA, Chief Secretary, Security Advisor sha ka sorkar Manipur, General Officer Commanding Spear Corps, u DGP Manipur Police, IG Assam Rifles (South), Home Commissioner, DIG CRPF bad kiwei kiwei ki kynrem ki lyndan na ka sorkar jylla, ki shipai bad kiwei kiwei kiba don bynta ha kane ka kam.
Da kaba jied ban wanphai sha ka imlang sahlang, kine ki briew da ka mon sngewbha ki la wan aiti 28 ki tiar ialeh kiba kynthup ïa ki suloi AK, suloi 303, ki pistol, ki suloi double-barrel, ki suloi single-barrel, suloi INSAS, suloi Self Loading, ki Carbine Machine Gun bad Rocket Propelled Grenade launcher, ryngkat bad shibun ki magazine, ki kuli bad ki tiar pynbthei.
Kane ka long kaba kongsan bha namar ym don uwei ruh na kine ki dkhot uba don bynta ha ki jingiateh iasuk ba ladep. Ka iadei bad ka pateng jong ka KCP, kaba la seng ha ka 14 tarik u Iaiong 1980 da ki riew pyrkhat komunist u Y. Ibohanbi bad u Ibopishak. Ha ki phew snem, ka jingduh mynsiem ka la pynpra ia ka kynhun sha ki kynhun kiba kham rit.
Ka kynhun jong ka People’s War Group (PWG) ka la paw kum ka kynhun kaba pynthut bha, kaba la ktah jur ïa ki district ha ki jaka them ba kynthup ïa ka Imphal East, Imphal West bad Kakching lyngba ki kam pyrshah imlang sahlang bad pyrshah ïa ka ri.
Naduh mynshuwa, ki jingwan pyndem na ka KCP (PWG) ki la long kiba kham duna, kum ki kynhun jong ki san haduh khatar ngut ki dkhot kiba la aiti ha ki bor synshar ha kine ki snem ba la dep. Ka jingpyndem jong ki 46 ngut ki dkhot kiba treikam ha kajuh ka por, kadei ka jingjia kaba ym pat ju jia mynno mynno ruh na ka bynta kane ka kynhun.
Watla ym lah ban ong da kaba shai ba kane ka pyni ia ka jingpynduh noh pura ia ka kynhun PWG, hynrei ka pyni ia ka jingtlot kaba jur ha ka bor treikam kaba pynduh pyndam ia ki rynsan kiba trei pyrshah ia ka imlang sahlang bad ka bor jong ki ha ka thain.
Kane ka jingkylla kaba jop ka dei ka jingkut jong ki taiew jong ka jingiakren da ki shipai Assam Rifles, ki pulit ka jylla Manipur bad ki tnad ba ïatreilang kiba la kyrshan da ki nongtrei jong ka Sorkar Jylla.
Ka rukom treikam jong ki kaba jai jai, kaba niewkor ia ki riew paidbah ka la pynshlur ïa kine ki dkhot ban iehnoh ïa ka kam lehnoh, kaba la plie ïa ka lad na ka bynta ka jingkyntiew ïa ki jingtei na ka bynta ki paidbah kiba la sahkut slem bad ka jingriewspah ha ka thaiñ.
