Shillong, Naitung 29: Ka National People’s Party (NPP) ka kyntait bad sngew lyngngoh iaki khubor ba la pynbna ha ki lad pathai khubor ba ka party kala sngap jar halor kaba iadei bad ka Foreign Contribution (Regulation) Amendment Bill, 2026.
Ka NPP ka pynrem jur ia kine ki jingkynnoh kiba khlem nongrim bad kiba mih na ki riew politik kiba thmu ban pynbiej paidbah bad pynwit iaka jingshisha. Ka NPP ka long kawei ka party kaba la bat skhem bad kren hakhmat ka sorkar pdeng ban da bad sumar iaki niam bad ki kynhun rit paid.
U Myntri Rangbah ka Meghalaya bad President ka NPP, u Conrad K. Sangma, u la ialam iaka kynhun ki nongialam niam na ki balang bapher bapher sha New Delhi ban kynduh ia u Union Home Minister, u Amit Shah.
Ha katei ka jingkynduh, u la pynpaw iaka jingsngap jingsngewkhia halor ka Section 16A(5) jong ka FCRA Bill khnang ba kan ym ktah iaka pule puthi, ka koit ka khiah bad ka kam shongsuk shongsain. U Amit Shah u la sngap bha bad kular ba kan don ka jingiakren bad kiba iadei bad kitei ki kam.
Ha u April 2026 ruh, u Myntri Rangbah lem bad u Deputy CM Prestone Tynsong bad ki nongmihkhmat ka Catholic Bishops’ Conference of India (CBCI) kila kynduh ia u Union Minister Kiren Rijiju ban dawa ki kyndon da ka ain ban nym pynshitom iaki kam ai jingiarap bad kynhun noh synniang ha ki jaka nongkyndong.
Ka NPP ka ngeit ha ka kam kaba pyni dak ym ha ka ktien tang ban pynpaw briew. Ka party ka long kaba kloi ban iada iaka hok bad ka bha ka miat u paidbah ha kano kano ka por.
