Shillong, Naitung 29: Ka National Institute of Fashion Technology (NIFT), Shillong mynta ka sngi ka la sdang ia ka Orientation Programme kaba lai sngi, kaba pdiang sngewbha ia ka kynhun ba thymmai jong ki samla pule na kylleng ka ri katba ki sdang ia ka jingpule jong ki ha kawei na ki jaka pule ba bha tam jong ka India na ka bynta ka jingsaindur, ka jingpyniaid ia ki kam bad ka teknoloji.
Ka jingialang plie kalong ka dak jong ka jingsdang ia ka bynta ba thymmai na ka bynta ki samla pule kiba mihkhmat ïa ki kolshor, ki ktien bad ki thaiñ bapher bapher jong ka India. Ia ka Orientation Prokram la saindur khnang ban pynsngewthuh ia ki samla pule kiba dang shu rung thymmai shaphang ki rukom ai jinghikai ha ka NIFT, ka rukom ai jinghikai kaba bun ka jingsaindur, ki nongrim jong ka jaka pule bad ki lad ki lynti kiba ki lah ban ioh katba ki pynkhreh ban trei ha ka kam saindur.
Ia kane ka jingialang la plie da u Anil Kariwala, Nongseng & CEO, Kariwala Industries Ltd., kum u Kongsan, bad u Dr Ravi Shankar Bhakat, Nonghikai jong ka Marketing, Indian Institute of Management (IIM) Shillong, kum u Symbud Kongsan.
Ha ka jingai jingkren jong u, u Anil Kariwala u la pynshlur ïa ki samla pule ban ym sahkut tang ha ka kamra pule bad ban pynkhreh ïalade na ka bynta ki jingdonkam kiba nang kylla jong ka kam saindur ia ki jain bad ka kam ba iadei bad ki jain ha ka pyrthei.
Da kaba shim nuksa na ka jingshemphang jong u ha kaba ialam ia ka kam kaba bun bynta kaba ngeit skhem ha ka jingpynmih mar kaba don ka jingbahkhlieh, ka jingiaineh bad kaba peit bniah ia ka jingbha, u la ban jur ia ka jingdonkam ban pyniasoh ia ka kam saindur bad ka jingtbit ha ka teknoloji, ka jingseisoh, ka jinglong ryntih ka ka kam bad ka rukom treikam kaba khlain.
U la kyntu ïa ki samla pule ba kin long kiba thrang ia ka jingnang jingstad, ban pdiang ïa ki kor ki teknoloji kiba dang mih, ban sngewthuh ïa ki jingkylla jong ka ïew ka hat bad ban ïai bteng ban kyntiew ïa ki sap jong ki khnang ba kin long kiba kiew shaphrang ha ka kam kaba bun ki jingïakhun.
U Kariwala u la pynshlur ruh ïa ki samla pule ba kin long kiba ngewthuh ialade katba ki dang ïai bteng ïa ka jingtbit ha ki kam ba ki la jied. Da kaba ban jur ïa ka jingdonkam jong ka jingsaindur thymmai, ka jingiaineh bad ka jingïatreilang, u la kyntu ïa ki ban iar ka jingmut jingpyrkhat katba ki dang iaineh ha ka pateng kolshor ba riewspah jong ka India. U la ban jur ba ka kam saindur ka sdang da ka jingsngewthuh kaba jylliew ia ki briew, ka jingthmu bad ka jingkitkhlieh.
U Dr Ravi Shankar Bhakat u la kyntu ia ki samla pule ba kin ithuh ba ka lawei jong ka kam saindur kam sahkut tang ha ka jingitynnad. U la ban jur ia ka bynta kaba nang kiew jong ki nongpynwandur kum ki nongsaindur thymmai, ki nongpynbeit ia ki jingeh, ki nongseng kam seng jam bad ki nongialam kiba lah ban wanrah jingkylla ha ki kam, ban pynwandur ia ka jinglong jong ki nongthied bad ban noh synniang sha ka roi ka par kaba iaineh.
Haba pdiang sngewbha ïa ki samla pule, u Dr Brijesh Deore, Director ka NIFT Shillong, u la ai khublei ïa ka kynhun ba dang shu pynrung thymmai na ka bynta ka jingioh rung ha kawei na ki jaka pule ba bha tam jong ka ri. U la pynshlur ia ki samla pule ban don ha ka jinglong ryntih ha ka jingpule jong ki, ka jingpynwandur bad ka jinglong kaba skhem.
U la ban jur ba ka jingpynwandur ka lah ban long kum ka lad kaba khlain ban wanrah ia ka jingsaindur, ka jingpynneh pynsah ia ka kolshor, ka jingiaineh bad ka jingkylla kaba bha ha ka imlang sahlang. U la kyntu ïa ki samla pule ban pyndonkam pura ïa ki lad jinghikai jong ka institute, ki jingïatreilang bad ki karkhana bad ka rukom ioh jinghikai kaba bun bynta katba ki kylla sha ki briew kiba la tbit ha ka kam.
Ha ka sngi ba nyngkong jong ka Orientation Programme la batai ruh ïa ki samla pule shaphang ka rukom ai jinghikai ha ka NIFT Shillong, ki jinghikai kiba bun bynta, ki rukom ai jingkyrshan ïa ki samla pule, ki jingdon jingem ha ka campus bad ki nongrim jong ka jaka pule.
