Shillong, Naitung 29: Ka seng HYC mynta ka sngi ka leit ban ia kynduh ia u Lat ka jylla u C. H. Vijayashankar ha Lok Bhavan ha kaba kila ai ia ka dorkhas ban kyrpad ia u ban ia kren bad ka sorkar pdeng haba ia dei bad ki jingeh kiba ka jylla ka ia kynduh.
Haba kren ha ki lat pathai khubor hadien ba la ia kynduh ia u Lat ka jylla u President ka seng HYC u bah Roy Kupar Synrem la ong ba ka mat kaba ha khmat eh kaba kila ia kren ka dei bad u Drok, la ong ba ka jingdon ki National Highway bad ka jingdon jan bad ka Golden Triangle kala pynsuk ban pynpoi ia u drok ha kane ka jylla.
Ha kane ka jingiakynduh kila kyntu ia u Lat ban ia kren bad ka tnad kam poh iing ka sorkar ban buh ia ka ophis jong ka Narcotic Control Bureau hangne ha Shillong, lada ka don ka ophis ha Shillong ka lah ban ia treilang bad ki pulit bad ki Custom ha kane ka jylla bad kiwei kiwei ki tnad ban khanglad ia ka jingioh rung suk u drok.
Kawei kaba kila ia kren ha kane ka jingiakynduh ka long ka jingbhah kam kaba 44% ia ki riewlum kane ka jylla Meghalaya kumba la paw na ki jingthoh kiba la pynmih na ka tnad personal ka sorkar pdeng, ka seng kala juh kren ia kane ba ki ophis ka sorkar pdeng kim bud ia kane.
Ha kane ka jingiakynduh kila ia kren ruh ha kaba ia dei bad ka Lum Survey namar kane ka hap ha ka jingpeit ia ka Defence Estate Office, kum ka seng kila iathuh ia ka jingeh kaba don ha katei ka jaka bad kiwei kiba mih na kane ka jaka.
Kum ka seng kala iakren ruh ia kaei kaba la jia hapoh NEHU, kila ia kren ruh ka jingthung ia ki nurse ha NEIGRHIMS ha kaba kum ka seng kala leit ia kren ia kane ka seng kala thoh ban thung kam 80% dei ban dei ki kynthei bad 20% dei ban dei ki shynrang ka seng kala kyrpad ia u Lat ka jylla un ia kren bad ka sorkar pdeng.
