Shillong, Naitung 29: u bah Alexender Hek MLA ka Pynthorumkhrah u la, thoh da ka shithi sha u MP Ka Rajya Sabha u James P. K. Sangma ba mih khmat ia ka jylla Meghalaya ha kaba u la ong ba ka jingpyntreikam ia ka Foreign Contribution Regulation Act kam dei ban ktah ia ki kam babha jong ki kynhun seng bapher bapher.
Ha kane ka shithi u la phah mynta ka sngi 29/Naitung/2026 u MLA ka Pynthorumkhrah u la ong ba lada don kano kano ka jingbidong kan ktah ia ki seng trei mon sngewbha kan ktah ia ki duk ki rangli bad khamtam eh ia kito ki briew kiba la shah ban bein ban shah niew bein ha ka imlang sahlang namar kine ki seng trei mon sngewbha ki trei na ka bynta ka bha ka miat jong u khun bynriew khlem da don kano kano ka jingniew shilliang.
Ha ka shithi u la kdew ba kum u MLA u la ia kynduh bad u kpa jong u Bam Kwai ha Dwar u Blei u Purno Agitok Sangma kaba u la ioh mynsiem shibun na u ha kaba iadei bad ka jingshakri ia ki paidbah bad bunsien u la shim ia ka nuksa jong ka riewkhuid ka Mother Theresa ba kumno kala shakri ia ki para briew.
Kine ki kynhun trei mon sngewbha da ki phew snem kila ai ka jingshakri ia ki rangli ki juki khlem da niew shilliang dei na ka niam aiu, ka jait aiu bad kynhun aiu ka jingtrei jong ki ka long kaba ym lah shuh ban thew namar dei lyngba jong ki la ri ia ki khunswet, la ri ia kiba duna ha ki dkhot met, kiba pang Nianglyngkut bad shibun bah ki briew kiba la shah ieh bein ha ka jinglong briew.
Kawei ka nuksa kaba paw shai kdar ka dei ka Missionary of Charity kaba la seng da ka Mother Theresa kaba la aiti ialade met ban mynsiem ban ai ka jingshakri ia ki paidbah kiba duk kiba rangli da kaba shim ia ki ban ai ia ka jingnang jingstad ban sumar ia ki ha ka pang ka shitom bad ban iarap ha ka por ba shah lynshop ha ka mariang.
U MLA ka 14 – Pynthorumhrah Constituency u bah Alexander Hek, u la pynkynmaw ia kaei kaba ka Mother Theresa ka kren ha ba ka leit sha kylleng ki ri jong ka pyrthei “lada phi dei u Khristan long u Khristan u babha, lada phi dei u Hindu long u Hindu u babha bad lada phi dei u Muslim long u Muslim u babha, lada phi don ha kano kano ka jingngeit kaba phi bud to long ki briew kiba bha”.
