Ampati, Nailar 07: Ka ophis treikam jong u Deputy Commissioner, South West Garo Hills, Ampati, kala pynbna ba ki nongpang kiba dei ki Scheduled Caste (SC) bad Scheduled Tribe (ST) kiba pang jingshitom kiba saphriang bad pisa kiba hap hapoh ₹5,00,000 shi snem ki lah ban ioh jingiarap pisa na ka Dr. Ambedkar Medical Aid Scheme (Revised-2026).
Ka Dr. Ambedkar Foundation (DAF) hapoh ka Ministry of Social Justice and Empowerment, sorkar India, ka pynlong ia kane ka scheme ban iarap ia kiba donkam jingsumar kaba kynthup iaki jingshitom kiba shyrkhei.
Ka jingiarap pisa kaba ha khliehduh ka long iaka jingsumar klongsnam kaba poi haduh T. 1.50 lak, katba ka jingsumar khyllai bad dialysis, ka poi haduh T. 3.50 lak, jingpang bampong, haduh T. 2.50 lak, ka jingpang na ka bynta jong ka jabieng haduh T. 2.00 lak.
Iaka jingpyn kylliang iaki dohjem shapoh met briew ka dei haduh T. 3.50 lak, jingpang jong u budlum ka dei haduh T. 1.50 lak. Katba kiwei pat ki jingshitom kan poi T. 2.00 lak, iaka rukom aplai, ki nongkynti ki dei ban pynpoi iaki kot kiba kynthup iaka Form bad ka dur passport. Iaka Estimated Cost Certificate, dei ba la soi da u Medical Superintendent.
Donkam ruh iaki Income Certificate, Caste Certificate bad Aadhaar Card lane Ration Card. Ki jingtip ba dei jong ka hospital (Account Number, IFSC Code) na ka bynta ban phah beit iaka pisa. Ia ki aplikeshon, dei ban pynpoi sha u Director, Dr. Ambedkar Foundation, 15 Janpath, New Delhi – 110001, 15 sngi shwa ka sngi jingsumar.
