Shillong, Nailur 02: Ka North Eastern Hill University (NEHU) bad ka North East Centre for Technology Application and Reach (NECTAR) kala pynlong ia ka jinghikai kaba ar sngi ia ki samla ka ri lum Jaintia ha Wahiajer kumno ban shna ia ki jingbam ba har rukom.
Ka NEHU – Deen Dayal Upadhyaya Community College kaba don ha Wahiajer ryngkat ka NECTAR kala pynlong ia ka jinghikai kumno ban shna jingbam kiba har rukom ia kane ka jinghikai ba ar sngi la sdang ha ka 1/Nailur/2026 bad la pynkut mynta ka sngi 2/Nailur/2026.
Kane ka jinghikai ka long kumno ban hikai ia ki samla ba kin pyndonkam ia ki kor ki bor katkum kane ka juk kaba mynta ba shna ia ki jingbam kiba bun jait kiba mih na ka rep ka riang, ki samla kiba la wan ban ia shim bynta ha kane ka jinghikai ki long 50 ngut.
Ha kane ka jinghikai la pyni sha ki samla kumno ban pyndonkam ia ki mashin ban pynmih ia ki jingbam kum na u sohtrun ba kan long ka umsoh, ka jam ki musli musla na u sohsaw kiwei ki mar rep kane ka kdew shai ba ka NECTAR ka kwah ban kyntiew ia ka jingpyndonkam ia ki kor ki bor ha ki kam shna jingbam bad ba kane kan long kawei na ki lad seng kam seng jam.
Ia ka jinghikai la ai da u bah Mariadon Pathaw Project officer ka NECTAR ha ka jingdon lang u Dhanjet Barman u officer ka NECTAR ban pyni kumno ban pyndonkam ia ki kor ki bor ha kaba shna ia ki jingbam.
Ha kane ka sngi pynkut ia ka jingai jinghikai la don lang u Dr. F.R.Sumer Principal ka DDUCC u Dr. Arun Kumar Sharma Director General ka NECTAR lem ba kiwei ki heh sorkar bad kine baroh ar ngut kila ai khublei ia ki nongwan iashim bynta ha kane ka jinghikai kaba ar sngi.
