Shillong, Nailur 15: Ka Bharatiya Janata Party Meghalaya kan pynlong ïa ka prokram kaban neh shi bnai kaba la ai kyrteng ‘Ka Rai Ban Shakri ne Seva Sankalp Abhiyan’ ban rakhe ïa ka jingdap 25 snem ka jingïaid lynti jong u Myntri Rangbahduh ka Ri U Narendra Modi ha ka jingshakri paidbah, kaba la sdang naduh ka por ba u la long Myntri Rangbah ka Jylla Gujarat ha u snem 2001.
Kane ka prokram kaban sa pynlong ha kylleng ka ri ka dei ka jingrakhe ïa ka jingaiti met bad mynsiem kaba khraw jong u Myntri Rangbahduh ha kaban shakri paidbah bad ha kaban tei ïa ka ri. Na ka bynta ka BJP Meghalaya, kane ka dei ruh ka lad ban pynkylla ïa kane ka jingrakhe sha ki kam kiba don jingmut bad kiban ai jingmyntoi ïa ki paidbah ha kylleng ka Jylla.
Kane ka jingrakhe kaban neh shi bnai kan sdang ha ka 17 tarik Nailur, kaba dei ruh ka sngi kha jong u Myntri Rangbahduh, bad kan bteng haduh ka 17 tarik Risaw. Ka 7 tarik Risaw kan long ka sngi kaba kyrpang bha, namar ka dak ïa ka jingdap 25 snem naduh ba u Narendra Modi u la rung sha ka kam paidbah ha u snem 2001.
Ka BJP Meghalaya kan pynlong ïa ki jingïalang bad ki prokram bapher bapher ha kane ka por, kiban pynleit jingmut tang ia ki kam ban ai jingshakri, ka jingkitkhlieh naka bynta ki paidbah kaban iohi ruh ia ka jingïashim bynta ki samla bad ki longkmie ha ka koit ka khiah, ka jingïada ïa ka mariang bad ka jingai burom ïa ki nongtrei kiba don ha khmat eh ha ka jingshakri paidbah. Ki prokram kin long kumne harum;
Ha ka 17 tarik Nailur, naduh ka por 6:00 janmiet, ki nongtrei BJP, ki nongkyrshan bad ki nongiohbynta ha kylleng ka Meghalaya kin ïashim bynta ha ka prokram “Tbeh ïa ka Mombati Jingkyrkhu.”
Kane ka prokram kan pyni ïa ka jingai burom, ka jingsngewnguh bad ki jingkyrkhu jong ki paidbah ïa u Myntri Rangbahduh U Narendra Modi, bad ban pynpaw ïa ka jingaiti jong u ha ka jingshakri ïa ka ri.
Ngi kyrpad ïa baroh ki paidbah baroh ban ïashim bynta shitrhem ha kane ka prokram bad ban pynpaw lang ïa ka jingaiti jong ngi sha ki nongrim jong ka jingshakri bad ka jingtei ïa ka ri.
Yn pynlong ïa ka Inter-School Drawing Competition ha ka kyrdan distrik ha ka 26 tarik Nailur, kaban ai lad ïa ki khynnah skul ban pynpaw lyngba ka jingmutdur ïa ki jingmut bad ki jingangnud jong ki na ka bynta ka India ba la kiew ne Viksit Bharat.
Kane ka jingïakob kan kyntiew ïa ka jinglah ban thaw bad ban pyrkhat thymmai jong ki khynnah skul, bad ha kajuh ka por kan pynïoh ïa ki ka jingsngewthuh kaba kham bha shaphang ka roi ka par jong ka ri bad ka jingdonkam ban noh synñiang sha ka imlang sahlang khamtam ia ki 25 snem ba u MR ula aiti ialade ban shakri ia ki paidbah.
Kum shi bynta jong ka ‘Rai ban shakri’ ka BJP Meghalaya kan ai burom ïa ki nongtrei Anganwadi bad ASHA ha ki centre bapher bapher jong ka jylla.
Kine ki nongtrei kiba don ha khmat eh ki don ka bynta kaba kordor n aka bynta ki paidbah lymba ki jingshakri ba kongsan kum ha ka koit ka khiah, ka bam khamtam ïa ki kynthei bad ki khynnah.
Ka jingnoh synñiang jong ki bunsien ka long kaba jar jar ha ki shnong ki thaw khamtam ha ki thaiñ nongkyndong, bad kane ka prokram ka dei ka dak jong ka jingsngewnguh jong ngi ïa ka jingshakri kaba ïaineh jong ki.
Ka BJP kan pynlong ïa ki Blood Donation Camps bad Health Camps ha ki jaka bapher bapher ha kylleng ka Jylla. Kine ki jingpynkhreh ki thmu ban kyntiew ïa ka jingai sngewbha ïa ka snam, ban pynmih ïa ka jingsngewthuh shaphang ka koit ka khiah bad ban pynshlur ïa ki nongtrei party bad ki paidbah ban ïashim bynta beit thik ha ki kam kiba lah ban pynim ïa ki mynsiem bad ban kyrshan ïa ka imlang sahlang.
Ka jingkitkhlieh ïa ka mariang kan long ruh kawei ka bynta ba kongsan jong kane ka campaign. Ki nongtrei BJP bad ki volunteer kin pynlong ïa ki prokram thung dieng ha ki jaka kiba biang ha kylleng ka Meghalaya.
Kane ka sienjam kan pynshlur ïa ki paidbah, khamtam ïa ki samla, ban ïashim bynta ha ka jingïada bad ka jingtei thymmai ïa ka mariang na ka bynta ki pateng ban wan.
Kum ka jingpynpaw ïa ka mynsiem jong Swachh Bharat bad ka jinghikai ban leh khuid yn pynlong ïa ki prokram pynkhuid bad jingïashim bynta ban pynkhuid ïa ki shnong bad ki jaka paidbah ha ki jaka bapher bapher.
Ka jingthmu jong ngi kam dei tang ban pynlong ïa ka kam ha kawei ka sngi, hynrei ban pynmih ïa ka dustur kaban pynneh jingkhuid, ka jingkitkhlieh kum ki nongshong shnong bad ka jingïashim bynta lang jong ka imlang sahlang.
Ha kaba kut, kane ka prokram ka long shaphang ban rah ïa ka khubor jong ka jingshakri paidbah na ka rynsan saiñpyrthei sha ki shnong bad sha ki paidbah ha ki tynrai jong ka imlang sahlang. Ki 25 snem jong u Myntri Rangbahduh U Narendra Modi ha ka jingshakri paidbah ki pyni ïa ka lynti kaba jrong jong ka jingaiti sha ki paidbah bad sha ka ri.
Ka rukom kaba bha tam ban rakhe ïa kane ka jingdap snem kam dei tang da ki jingrakhe, hynrei ka long ban shakri ïa ka imlang sahlang bad ban wanrah ïa ka jingkylla kaba bha ha ka jingim jong ki briew kiba don sawdong jong ngi.
Lyngba kine ki prokram, ka BJP Meghalaya kan pyrshang ban wanrah lang ïa ki nongtrei ka party, ki khynnah skul, ki nongtrei ka koit ka khiah, ki kynthei, ki samla bad ki paidbah na kylleng ka Jylla ha kawei ka jingpyrshang lang ban pynshlur ïa ka kam ban shakri, ka jingkitkhlieh paidbah bad ka jingtei ïa ka ri.
Nga kyrpad ïa baroh ki paidbah ban ïashim bynta shitrhem bad da ka dohnud baroh ha ka kane ka prokramm ka ‘Rai ban Shakri’ bad ban pynlong ïa kane ka campaign kaba neh shi bnai kum ka jingai burom kaba don jingmut ïa ki 25 snem jong ka jingshakri paidbah.
