Shillong,Nailur 15: U Myntri Rangbah ka Jylla Conrad K Sangma mynta ka sngi 15/Nailur/2026, ula pynlait paidbah ia lai tylli ki Mobile Medical Unit (MMU) kiba thmu ban rah ia ki jingai jingshakri ha ka koit ka khiah sha ki 93 tylliki Shnong ka thain Mawpat, Pynursla bad Baghmara.
Kine ki Unit, ba kyrdan da ka ALtius hapoh ka Corporate Social Responsibility (CSR) bad pyntreikam da ka Apollo Foundation-Total Health, la khmih lynti ba kin shakri ia ki nongshongshnong ba kot palat ia ka 2 lak ngut, ong ka Foundation kat kum ka jingbuh jingkhein bala lum na kine ki jaka.
Na kine ki 93 tylli ki shnong bala ithuh ban ai ia kane ka jingshakri, 45 tylli ki dei kiba don ha ka thain Mawpat, 26 tylli ha ka thain Pynursla bad 22 tylli ha ka thain Baghmara.
Ka Mawpat bad Pynursla ki dei ki Community & Rural Development (C&RD) Block ka East Khasi Hills katba ka Baghmara ka dei ha South Garo Hills.
Ha kine ki MMU, ki doktor bad ki nongtrei ka koit ka khiah bala hikai pyntbit, kin iasyllok ia ki nongpang, khmih ia ki jing pang, ai dawai, buddien ia ka jingsumar bad buh jingthoh ia ki nongpang da ki kor technology ha man ki shnong ki thaw.
Ki nongpang kiba dang donkam shuh shuh ia ki jingkhmih ia ki jingpang lane donkam ia ka jingsumar ba kyrpang, yn sap hah sha ki jaka sumar kiba kham heh.
Ka prokram kan pynleit jingmut eh halor ka jingkhmih bniah bad sumar ia ki jingpang ki bym iabit ne ki non-communicable disease (NCD), nalor ka jingai jinghikaihalor ka koit ka khiah bad ban lap kloi ia ka jingpang. Kan don ruh ka jingkhmih bniah ia ka jingpang bampong bad kiwei kiwei kat kum ka jingdonkam ki shnong.
Haba kren ha ka jingialang,u Conrad ula pynpaw ba ka jingpynkhlain ia ki lad ai jingsumar kaba lahban ioh da baroh, ka dei kawei na ki mat treikam ba hakhmat eh jong ka Sorkar naduh u snem 2018.
“Katba ki jingtei bad ka GDP ki long kiba kongsan, kan long leh noh ei lada ki jingmyntoi kim poi sha man ki nongshong shnong. Ta ka daw ka koit ka khiah bad ka pule dangle ka dei kaba ngi la buh hakhmat eh” ula ong.
U Myntri Rangbah ula ong ba ka technology kala shim ia ka bynta kaba kongsan bha ha ki jingpyrshang jong ka Sorkar ban weng ia ki jingeh ha ka koit ka khiah bad ka kam pule dangle.
U Conrad ula ban jur ruh ba ka jingjop jong ka Mobile Medical Unit kan shong eh ha ka jinglah ban ai ia ka jingshakri sha ki nongpang ban ia kaba pynlait ia ka.
“Ban pynlait ia ki ambulance ka dei ka bynta kaba suk palat. Ka jingkmen ba shisha kan wan ynda ngi la iada ia ki jingim, ynda ngi la lah ban ai ia ki dawai sha ki khunlung, ynda ngi la lah ban shimkhia ia kiba duk ba raitoi bad ki tynmen ki kro” ula ong.
Ula pynpaw ba kane ka sienjam kan nym don jingmut eh lada ia ki kali ym shym la pyndonkam bad ban jur ba ka jingpyn leit jingmut ka dei ban long halor ki nongpang bad ka jingiada ia ka jingim lyngba kane ka prokram.
U Conrad ula ban jur ruh ia ka jingdonkam ban pynkhlain ia ki lad pyniasoh digital ban kyrshan ia ki jingai jingshakri ha ka koit ka khiah lyngba ki kor technology, haba kdew ia ki jingpynsngew ba ulaioh lyngba ka CM-Connect.
