Shillong, Nailur 14: Ka jingialang ka Tournament Committee ka Shillong Sports Association kaba la long mynta ka janmiet jong ka sngi nyngkong ka taiew, ka la rai ba kan shain kuna ia ka Shillong Lajong FC, kum shi bynta ka jingkum sei bakla ka jong ka haduh lai ngut ki rang ialehkai bym dei nangne napoh ka jylla Meghalaya, kaba la iaid lait ia ka kyndun ialehkai kat kumba la pruid dak.
Kane ka jingkum sei bakla ka Shillong Lajong FC haduh lai ngut ki player bym dei na Meghalaya ka dei ha ka por ba la iakhun pyrshah ia ka Sawmer SC ha ka lympung ialehkai jong ka SPL ba la long myn ha ka sngi Saitjain ka taiew ba la dep, ha SSA Stadium.
Kumta da kane ka rai, wat ha ka por ba iakhun ka Shillong Lajong FC ka la thep kput haduh 6 kol bad ka Sawmer SC ka la ioh ba kan pynphai shi kol, hynrei ha ka por ba ia bujli ia ki player ha madan, ha ka jingbym poi pyrkhat, la kum sei madan haduih lai ngut ki rang ialehkai bym dei na kane ka jylla.
Hadien kane, na ka liang ka Sawmer SC, kam banse ba kan buh ia ka jingujor (protest) ka jong ka sha ka SSA, bad dei ha ka jingialang Ka Tournament Committee kaba la long mynne ha kaba la khot lang ia ki dkhot ka Lajong bad Sawmer, ba la shim ia ka rai ba da kane ka jingbakla, ka Lajong na madan ha madan kan duh ei ia ka jingjop lem kaba leit noh pat sha ka kynhun ialehkai ka Sawmer.
Kane ka kuna ia ka Shillong Lajong ka jia long hadien ba la lap bad shem ba ka la pynkhein ia ka kyndon pyniaid ba 9, kaba la dep ban sam iar sha baroh ki klob ne team ba iakhun ha ka SPL ha ka 8 tarik u Naitung jong u snem 2025.
Kat kum katei ka kyndon, la shah ia ki team ne klob ba ki lah ban pynialehkai ne pynmih madan tang 2 ngut duh ki rang ialehkai bym dei ki nong Meghalaya, kaba ha kane ka sngi jong ka jingiakhun, ha ka jingbakla, ka Lajong ka la kum sei madan haduh lai ngut.
Kat kum ka thup ialehkai, u Lakpa Lama ula rung sha ka thup ialehkai First XI, bad ki arngut kiba la pynmih bujli pat (substitute) pat ki long u Lalmuansanga bad u Abelson Jachi.
