Shillong, Risaw 22: Ka tnad jngoh kai pyrthei mynta ka sngi 22/Risaw/2026 kala khot ia ka jingialang ia ki dorbar shnong kiba hap ha ka Raid Laban bad kumjuh ia ka Joint Action Committee ha State Convention Centre khnang ba ka sorkar kan ioh ban pynshai haba iadei bad kane ka jingtei ia ka Ropeway na Laitkor Peak sha Madan Laban.
U bah C.V.D. Diengdoh IAS, Commissioner Secretary ka tnad jngoh kai pyrthei u la batai haba iadei bad kane ka skhim kaba la sdang ban saindur ha u snem 2012 bad dei ha u snem 2019 ka sorkar kala shim ia ka rai ban pyrshang ban pyntreikam ia kane ka Ropeway ha u Lum Shyllong.
Kaei kaba kila don ha ka jingmut jingpykhat, la kan ktah ne em ia ka um hato ka pynjaboh ne em ia ka lyer bad ban pynlong ia ki jingiamir jingmut haba iadei bad kane ka Ropeway bad dei ha u snem 2021 la pynkhreh ia kane ka skhim.
Dei ha u snem 2022 la pynlong ia ka jingiamir jingmut bad ki paidbah bad hadien kata ha u snem 2023 la iasoi ia ka dulir la ioh ia ka NOC wat na ki shipai suin bad na ki shipai ryngkew dei ha u snem 2024 la dep ban pynkhreh ia ka skhim.
Ban shna ia kane ka Ropeway la ioh ia ka jingmynjur wat na ka tnad khlaw jong ka sorkar pdeng dei ha u snem 2025 la ai ia ka jingbit ban trei bad ha u snem 2026 mynta u snem la ai ia ka jingbit ban shna ia ki iing ban sdang ia ka Ropeway na kjat Laitkor Peak sha Madan Laban ka jinglut na ka bynta kane ka Ropeway ka long T.151/-klur tyngka.
Hadien ba la dep ban pynshai na ka liang u Commissioner Secretary ka tnad jngoh kai pyrthei, u Secretary ka Raid Laban u la pyntip ba la kjot ia ka jingiamir jingmut haba iadei bad kane ka Ropeway hynrei na ka liang ka Joint Action Committee hapoh ka jingialam ka Dr. Lida Marbaniang kala ong ba ka dorbar Raid Laban kala thok namar khlem khot ia ka jingpynsngap paidbah bad la kyrpad ban pynsangeh shwa ia ka jingialang bad khot pat ha kawei ka sngi hynrei khlem da sngap ia ka jingkren kala mih jyndat noh na ka jingialang.
Ha kane ka jingialang kila don katto katne ki riew rangbah kiba la buh ia ki jingkylli ha kaba iadei bad ka um, ka lynti syngkien ka surok ia kane ka jingkylli la pynshai da ki ophisar ka tnad jngoh kai pyrthei da kaba pyni ia ki map ba kan nym ktah ia ka um namar ka Ropeway kam dei ha u Lum Shyllong hynrei ka long na kjat u Lum Laitkor Peak sha Madan Laban.
Haba iadei bad ka jingong ba kam shym don ka jingpynsngap paidbah na ka liang u Commissioner Secretary u la pule ia ki shithi kiba la phah sha ki hynniew dorbar kiba hap ha ka Raid Laban ha u snem 2022 bad kaba sngewsih ba ha kane ka jingkhot ia ka jingiamir jingmut kiba la poi sha ka jingialang ki long tang 27 ngut.
Naduh ba sdang haduh ban sdang ka kam la leh ha khmat u paidbah paidlang kam don kata ka jingleh kaba khlem da iatip lang ha kane ka jingialang la pynshai namar ba ka jaka ba kane ka Ropeway kan don ka dei hapoh u pud u sam ka jaka sorkar kumta ym shym la khot ia ka jingpynsngap paidbah hynrei la khot ia ka jingiamir jingmut jong kito ki paidbah kiba hap ha ka Raid Laban.
