Shillong, Nailur 14: U myntri rangbah ka jylla u Conrad K. Sangma mynta ka sngi 14/Nailur/2026 u la leit ban sam ia ki cheque T.20,000 hajar/- sha ki nongdie madan kiba la pynkynriah sha Brightwell Bungalow ha Barik ha ka jingiadon lang u bah Sanbor Shullai myntri sorkar, ka kong Ampareen Lyngdoh MLA bad u CEO ka Shillong Municipal Board.
U Myntri rangbah ka jylla haba kren ha kane ka jingsam ia ki Cheque u ai khublei ia ki MLA, ki ophisar ka tnad pynroi sor kumjuh ki ophisar Shillong Municipal Board bad ia ki nongshong madan kiba la iatrei lang ban pynlong ia katei ka jaka kumba ka long mynta.
U myntri rangbah u la ong ba ka Brightwell Bungalow ka dei ka iing sorkar kaba la mang ban shong u myntri ba peit ia ka tnad pynroi sor hynrei na ka bynta ka jingiabit ia biang lang u myntri u la pyllait noh ia katei ka jaka bad ban ai jaka ia ki nongshong madan namar ka jingim jong ki briew ka long kaba kham kongsan.
U myntri rangbah u la ong ba ka jingwan ka National Game la hap ban pynitynnad ia ka nongbah Shillong bad ban pynlong ia ki lynti kiba long ban iaid kjat bad kane ka jingleh ka dei kaba kongsan bad kam dei kaba suk hynrei la leh ia kane na ka bynta ka jingbit jingbiang jong baroh lang.
U myntri rangbah u la kyntu ia ki nongwan jngohkai pyrthei ia ki paidbah ba kin wan sha kum kine ki iew namar ki don bun jait ki jingdie ha kum kine ki iew u myntri rangbah u la ong ban kham khring shuh shuh ia ki briew yn pynlong ia ka tem ka put ha kum kine ki jaka.
Ha kajuh ka por la ong yn sa shna ia ki painkhana, yn pynbha ia ki rynsan ban buh ia ki mar ban die bad ba yn sa dang pynbha shuh ia ka jingring light khnang ba ka jingshong iew shong hat kan long kaba bit ba biang wat ha ka por janmiet.
