Sohkynduh, Nailur 17: Iaka 1st MLA Connect Programme jong ka 28-Sohra Assembly Constituency, la long ha ka shnong Sohkynduh ha ka 16 tarik Nailur 2026, lem bad ka jingiashim bynta jong ki nongshong shnong jong ka Sohkynduh, Rymmai Mawskhen, bad Mawbawein.
Ha katei ka prokram, la pyniaid da u BDO ka Laitkroh C&RD Block, u bah Wankhrawkupar Kharbuli, ha ka jingiadon lang u MLA jong ka 28-Sohra Assembly Constituency, u bah Gavin Miguel Mylliem; ki heh sorkar jong ki tnad bapher bapher ka ophis sorkar, u Mynjurlang Majaw, u Acting Chief ka Sohra; u rangbah shnong bad ki nongshong shnong katei ka thain.
Ha katei ka prokram, une u MLA u la kren shaphang ka jingthmu bad ka jingdonkam jong ka MLA Connect Programme, kaba don iaka jingmut ban pynskhem iaka jingiadei bad jingiatreilang hapdeng ki nongmihkhmat ba shah jied, ka imlang sahlang jong ka kyntoit bad ki tnad sorkar.
U la ong ba katei ka prokram ka ai iaka rynsan ba kongsan khnang ban sngewthuh iaki jingeh bad ki paidbah ki shem naduh kaba sdang bad ban sngap iaki jingeh jong ki. Une u MLA u la ban jur shaphang ka jingdonkam ka jingiatreilang kaba khlain hapdeng ki paidbah bad ki tnad jong ka sorkar khnang ba kino kino ki jingeh kiba ktah iaka imlang ka sahlang kin lah ban pynsngap ha ki heh nongtrei bad ioh jingiarap bad jingmyntoi na ka bynta ki paidbah.
Ha katei ka prokram, ki nongmihkhmat bad ki nongshong shnong kiba iashim bynta ki ioh iaka lad ban pynpaw ki jingeh bad ki jingdonkam jong ki. Katba ki mat ba kongsan hangne ki kynthup iaki jaka ai jingsumar kiba biang, ka jinglong jingman ka surok bad ki jaka iaid ki paidbah, ka jingbym biang ka um bam um dih bad ka jinglip light kaba khah khah ha kine ki por mynta.
Kine ki nongshong shnong kila ong ba kum kine ki jingeh kila ktah iaka jingim ba man ka sngi ka jong ki, ka jingkhih bad ka lad ban ioh iaki jingdonkam. Katba ki nongmihkhmat jong ki tnad sorkar kiba iashim bynta kila kular ha katei ka jingialang ba kin iatreilang ryngkat bad ka imlang ka sahlang bad ki bor ba dei peit khnang ban ioh pynpaw iaka jingeh jong ki.
Ka tnad kala ong ruh ba kine ki jingeh kin rah sha ki bor ba dei peit na ka bynta ban trei noh mar mar. Ka 1st MLA Connect Programme ka long kum kata ka rynsan kaba don ka jingmut ban ia tai nia hapdeng ki paidbah, ki nongmihkhmat ba shah jied bad ki tnad sorkar.
Katei ka prokram ka thmu ban pynskhem iaka jingia sngewthuh lang bad jingiatreilang bad kan sngap iaki jingdonkam bad ki jingeh jong ki paidbah ka 28-Sohra Assembly Constituency.
