Shillong, Nailur 17: Ka kynhun ki nongthoh khubor kaba don 14 ngut ki dkhot kaba kynthup ïa ki nongthoh khubor na Uttar Pradesh kiba la trei slem ia ka kam, kiba la wan jngoh ïa ka jylla Meghalaya kum shi bynta ka sienjam ban pyniadei bad ki lad pathai khubor ba la pynlong da ka Press Information Bureau (PIB), Sorkar India, mynta ka sngi ki la ïakynduh ïa u Lat ka Jylla Meghalaya u C. H. Vijayashankar, ha Lok Bhavan, Shillong.
Ha ka jingïakren, u Lat u la ban jur ïa ki jaka treikam ba kyrpang ha ka imlang sahlang jong ka Meghalaya, kynthup ïa ka dustur kaba khlaiñ jong ka jingïashim bynta jong ki paidbah ha ka jingsynshar bad ka rukom ai jait kmie ha ka Jylla. U la ong kumno kine ki rukom ki la pynwandur ia ka jingim ha ka imlang sahlang bad ka jingiadei ha ka imlang sahlang ha ka Jylla.
U Lat u la ban jur ruh ïa ka jingdonkam ban pynneh pynsah ïa ka jinglong kyrpang jong ka Meghalaya katba dang ialeh ban ioh ïa ka roi ka par kaba dang ïai ïahap bad ki jingdonkam jong ki nongshong shnong. U la pynpaw ia ka jingkordor jong ka jingiadei bad jingsngewthuh kaba kham khraw hapdeng ki thain bapher bapher jong ka ri.
Ki nongthoh khubor ki la ïakren bad u Lat halor ka histori jong ka Meghalaya, ka roi ka par bad ki jaka treikam ha ka imlang sahlang, da kaba ïohi dalade shaphang ka Jylla bad ka rukom im ba kyrpang jong ka.
Kane ka kynhun ka don ha ka jingwan jngoh kaba ar sngi ia ka Jylla Meghalaya ban ïoh jingtip dalade shaphang ki kam jngohkai pyrthei jong ka Jylla, ki sienjam pynroi bad kiwei kiwei ki bynta kiba iadei bad ka bha ka miat jong ki paidbah. Ki nongthoh khubor kin ïasam ïa ki jingshem bad ki khana jong ki sha ki briew ha Uttar Pradesh lyngba ki rynsan pathai khubor jong ki.
