Shillong, Nailur 17: U Myntri ka pule puthi, u bah Lahkmen Rymbui myn ha ka sngi ba ar, u la plie pyrda iaka ‘Food Fest’ kaba la pyniaid da ka Evangelical Teachers Fellowship of India (ETFI), Meghalaya Chapter, da kaba rakhe iaka dustur shet jingshet bad ka jingia syllok hapdeng ki nonghikai khristan.
Ha katei ka jingialang, u bah Lahkmen Rymbui u la ban jur iaka mat ba kongsan jong ki nonghikai, ki kmie ki kpa bad ki dkhot ka imlang ka sahlang ha kaban pynwan dur iaka pateng jong kiban wan. U la ong ba ka kam hikai kam dei tang hapoh ka kamra ki khynnah skul hynrei ka dei kawei na ki kam ba la shimkhia, lem bad ka jinghikai, ialam lynti bad ka jingpyn shlur ha kaban tei iaka imlang ka sahlang kaba roi bad ba shngain.
U bah Rymbui u la kren ruh shaphang ka jingdonkam ban iarap iaki samla lud ba kin ithuh iaka lad ha ka pyrthei ban nang pyn kiew iaka digital bad jingiadei paralok. U la kyrpad iaki nonghikai bad ki kmie ki kpa ba kin ialam lynti iaki samla ba kin tip hapdeng ka jingshisha bad ka kaba thok bad pynshlur ban shimkhia bad ka jingpyn donkam iaka rynsan social media bad ka teknologi ha ka rukom kaba bha.
Da kaba ban jur shaphang ka jingdonkam jong ka jingkyrmen bad jingpyn shlur, u Rymbui u la ong ba ka imlang ka sahlang ka dei ban iatreilang ryngkat bad ki samla khnang ba kin nym duh jingkyrmen, hynrei ki dei ban ioh mynsiem ban ithuh iaka sap ka tynrai jong ki bad ban synniang kaba donkam iaka imlang sahlang.
U la pynpaw ka jingsngew nguh iaka ETFI Meghalaya Chapter bad baroh ki nongiashim bynta na ka bynta jong ka jingpyniaid jong ki ia kane ka tamasa bad u la kitbok kit rwiang iaki ba kin nang bteng kane ka jingtrei jong ki bad kin shem ka jingjop ha ki kam jong ki bad ban ai mynsiem iaki nonghikai bad ka imlang ka sahlang kaba iar bad ba roi.
