Shillong.Rymphang 17: Ka seng civil society women’s organisation (CSWO) mynta ka sngi kala pynpaw ia ka jingsngewkyndit jong ka ba ia ka video kaba la pynlait paidbah sha ki lad pathai khubor kaba pyni ba ki lehnoh GNLA kila sait iap ia u wei u briew u ba la shah teh ki khmat jong u ka dei kaba la rim bad kaba la jia shisnem mynshuwa.
Kane ka Video ka dei kaba la pynlait paidbah da u Chairman jong ka seng A’chik Peace Volunteers Council (APVC), Che Guevera Marak. Kane ka Video ka neh tang 26 sekon kaba la ring ha ka surok bah NH-44E kaba dang shna mynta.
Kane ka seng APVC ha ka shithi kaba la phah sha u union home secretary, u Anil Goswami kala ong ba kane ka Video ka long ban pynjunjar ia ki paidbah.
Na ka liang jong ka President jong ka CSWO, ka kong Agnes Kharshiing kala kam ba kane ka Video kaba la phah sha ki lad pathai khubor ka dei kaba la sam de ki pulit bad ka la kdew kti pyrshah ia u TC Chacko bad ia u IGP GHP Raju.
Ka kong Agnes kala ong ba kitei ki ophisar kim leh ei ei hynrei ki bun kam ha kaba tap ia ki phone jong ki paidbah bad katei ka Video ka dei kaba la ioh ban kurup da ki pulit ha ka por ba ki leit ban khynra ia ka ktem jong ki GNLA.
Na ka liang jong ka CSWO ka ong ba ha ka jingshisha ia kane ka jinglap jong ki pulit la dei ban buh ha ka jaka kaba shngiam bha, la kynnoh ba kane ka jingleh ka dei tang ka buid ban pynkylla ia ka jingmud jong pyrkhat jong ki paidbah.
Ka CSWO ka dawa ba dei ban tohkit ia kane ka Video bad ban wad u ei u ba shah siat na ka liang jong ka president jong ka CSWO kala kynnoh bun jaid pyrshah ia ki heh pulit bad ia ki officer jong ka sorkar ban kynnoh ba ki ia don kti ha kiba bun ki kam bamsap.(SP News)
