Shillong, Naiwieng 01: Ha ki mawjam jong ka sur rwai sur tem tynrai Khasi, ka thup jingrwai Her Sha Ka Thong da ka kynhun ki kaitor bad duhalia ba la jer Da-La-Riti la pyllait paidbah da u komngsan Bah F R Kharkongor, kher rangbah ka sorkar jylla, ka ba la pynkiew rasong ia ki surrwai surtem baphieng ba la kynshew da ki phew snem.
Ha ka jingkren jong u kongsan u la iaroh ia ki jingrwai jong ka Da-La-Riti bad u la kdew ruh ba ka long ka lad ban pathai ia ki jingrwai tynrai lyngba ka snurpathai Gungunalo, khnang ba ki paidbynriew kylleng ka pyrthei kin iohlad ban sngap ia ki jingrawi Khasi tynrai.
Ka kaitor nongialam jong ka kynhun, ka Dalariti Kharnaior ka la iathuh khana ia ka lynti ba dap tang da ki raieh raidam shwa ban poi sha ka thong ba la lah ban pyllait syndon ia ka thup jingrwai Her Sha Ka Thong. Ha ka sngi pyllait paidbah ia kka thup jingrwai la ia don ryngkat ruh ki kynrem lyndan jong ka surrwai surtem kynthup ia u Bah Lou Majaw, Rudy Wahlang, Kit Shangpliang bad Daminot Wankhar.
Ki ba la ia shim bynta ha kane ka sngi khraw ki kynthup ruh ia u Bah N Munish Singh, Zonal Dirtector ICCR, kum u symbud kongsan, u Payiem Laborious Manik Syiem kum u kongsan kyrpang bad kiwei kiwei ki kaitor bad barikor jong ka jylla.
Ka thup jingrwai Her Sha Ka Thong ka dei ka kyrteng ba bit ba biang palat ha kata ka sngi ba ka kynhun Da-La-Riti ka la tur bad ia ksaid lyngba ki byllai ki diengpynkiang haduh ba kin da lah ban long ka kynhun ka ba la ioh jingithuh na kylleng bad khamtam ban shah jied ha ka snurpathai Gungunalo na ka bynta ban pynphriang ia ki jingrwai sha satlak pyrthei.
Ha kane ka sngi khraw la wan pynshngaiñ ruh da ka kher rangbah jong ak snurpathai Gungunalo, ka Sherley Singh ka ba la batai bniah shaphang ka bynta jong ka Gungunalo ha ka ba pynphriang ia ki jingrwai khnang ba ki nongrwai kin ioh kamai da la ka umsyep lajong khlem da shah knieh bainong ha ki nongkhaii.
Kum shi bynta ban pynshlur bad ai mynsiem ia ki kaitor bad duhalia batbit ha ki sur tynrai Khasi ka Da-La-Riti ka la pynkup burom da ki khusnam ia byllai ki kaitor bad duhalia ba kynthup ia ki samla Batlador Khongnoh Shibor Mawkon Nashlemi Lyngdoh Haniel R Kharlukhi Jeremy B Mawlong Redeemson Pakma Bruceson Lyngdoh Johanan Lyngdoh Balamphrang Kharbuli Gideon Z Lyngdoh Iohbor Rngikseh.
U Bah Franky Mylliemngap Aurilia Mawlong Ofilia M Kharnaior Marbakordor Syiemlieh Heimonmi Phawa Mebabhaboklang Marbaniang David Rogers Dhar Elisheba Khongthaw Fulvia N Kharnaior Ethan Wanpynshngaiñ Kharnaior Nangteiskhem Shabong Silvereen S Kharnaior and Dawanshisha Kharnaior.
Ka thup jingrwai Her Sha Ka Thong kan lomng u mawjam sha ka thong jingjop bad ka nam ba la prat lynti bad iaineh ban kyntiew ia ki sur tynrai Khasi da ka kynhun Da-La-Riti. Kane ka sngi ba la pyllait paidbah ia ka thup Her Sha Ka Thong kan long ruh ban kynshew ha ka thiar jong ki surrwai surtem tynrai Khasi pateng-la-pateng ha ka lawei.
