Shillong, Nailur, 17: Ka Meghalaya Bharat Scouts bad Guides, mynta kum shi bynta jong kawei na ki jingialehkai ba dang iaid jong ka National Level Training of Trainers (TOT) ha youth led action on climate change(YLACC) Project kaba la pynlong da ka Bharat Scouts bad Guides, National Headquarters.
Ia kane la sdang naduh ka 15 haduh 19 tarik Nailur 2026, ha kaba kala iashim bynta ha ka jingiaid paidbah ban pynkhuid naduh State Headquarters shaduh Police Bazaar ha ka por mynstep da kaba pyn kynmaw iaka jingdonkam ban sumar iaka mei mariang.
Ha katei ka prokram, ka kong M. Lyngdoh, ba dei ka State Secretary Meghalaya Bharat Scouts bad Guides, Shillong, kala pynkynmaw ruh iaka sngi jong ki nongniah kali lane ka National Drivers’ Dignity Day, kaba la thmu ban kynmaw burom iaki jingnoh synniang kiba khraw jong ki nongniah kali kamai ha ka ioh ka kot jong ka thain.
Kine ki nongiashim bynta kila ai sngewbha ruh da ki jingthung ba dei ki dieng ba dang lung sha ki kali local bad nongniah tourist ha Police Bazaar da kaba ban jur iaka jingdonkam ban pynshongdor iaka jingshngain ha ka niah kali bad bud ryntih iaki kyndon jong ki pulit pyniaid kali haba iaid ha ki surok.
La bynrap ba ha katei ka prokram, la pyn kynthup iaka jingpyn ithuh bad kyrpang iaki nongniah iaki bos jong ka STEMS Meghalaya ha State Headquarters, da kaba rakhe iaka jingkular jong ki ban ai ka jingiada bad ka shong shngain ha ka leit ka wan na ka bynta jong ki samla pule, ryngkat bad ka jing ithuh iaki nongniah jong ka Meghalaya Bharat Scouts bad Guides.
Kane ka jingtrei shitom ka pyni iaka jingnoh synniang met bad mynsiem jong kane ka kynhun na ka bynta ka jingkit khia ka imlang ka sahlang bad ka jingpyn shai halor ka jingiada iaka mariang.
