Ampati, Nailur 17: Na ka bynta jong ki longiing longsem ba jngai jong ki nongshong shnong ka South West Garo Hills, la don ka jingleit jong ka kynhun jong ka koit ka khiah ba kin ioh ka lad ban pynkylla iaka jingartatien sha ka jingiada.
Haba ka kynhun ka koit ka khiah jong ka Mahendraganj Community Health Centre (CHC) kala poi ha Ghugrakandi, Kukurmua bad Tungrurchar ha ka sngi Balang, kawei na ki mat ba kongsan hangne ka long ka jingkyntait ban ai tika iaki khyllung.
Ha ka jaka ba kin leit noh haba kila poi ha jingkhang, hynrei katei ka kynhun kala shim iaka por jong ki ban iakren bad kane ka longiing, ki sngap iaki jingeh jong ki bad kila batai shai shaphang ka jingdonkam ban ai tika ha ka por ba biang ka long kaba donkam na ka bynta ka met ba koit ba khiah jong ki khynnah khyllung bad ban ioh jingiada na kiwei ki khniang jingpang.
Ha katei ka jingleit, ba la lam khmat da u Dr. Noor Ain Khan, MS cum Sr. M&HO, I/C Mahendraganj CHC bad I/C MCH, Mahendraganj, ka long kawei na ki bynta kaba la shimkhia bad ka jingthmu ba ka tnad ai jingsumar kan poi sha ki longiing longsem kiba lehse ki shem jingeh ha kaban ioh iaki jingshakri.
Katei ka kynhun kala leit kynduh iaki longkmie ba ap jingma na ka jingarmet, da kaba ai jingmut halor ka jingdonkam ban sumar ha kum kane ka por, ka jingleit check up man ka por bad leit phah sumar ialade sha ki jaka ai jingsumar.
Hynrei kane ka jingleit jong ki kam kut tang ha kaban ai jingmut ia kiwei, ha kaba la leit rah ia ar ngut ki longkmie sha Mahendraganj CHC lyngba ka kali kit nongpang jong ka CMSMS, ha kaba ki khun jong ki, kila ioh tika ha katei ka jaka ai jingsumar.
Kane ka jingleit jong ki ka pyni iaka jingialong kawei ban iatreilang ryngkat bad ka jingkyrshan ban pynbiang ki kali kit nongpang ka iarap shibun iaki longiing longsem ba sah jngai bad ki jingshakri kiba donkam khamtam ha ka koit ka khiah.
Na ka bynta jong ki nongtrei ka tnad ka koit ka khiah, kane ka jingleit kam dei satia shaphang ka jingleit ai tika. Ka dei shaphang ka jingtei iaka jingshaniah, jubab iaki jingkylli bad pyn thikna ba ki longiing kin sngewthuh iaka jingdonkam jong ka jingsumar ha ka por ba biang.
Kum katei ka jingleit jong ki ha man ka thliew iing briew, ka long kaba donkam khamtam ha ki jaka nongkyndong bad kiba shem jingeh ban leit sha ki jaka ba jngai, ha kaba ka jingjngai, jingartatien bad ka jingduna ka jingpyn husiar teng teng ka long ka jingkah lynti ban leit sumar.
Da kaba pynlong ia katei ka jingleit jong ki sha kine ki longiing longsem bad iakren bad ki da kaba pynbiang iaki kali kit nongpang, ki nongtrei ba hakhmat ki bteng ban long ki kongsan ha kaban pynskhem iaka jingai tika bad ai jingsumar iaki longkmie ba armet naduh ba sdang.
U Dr. Noor Ain Khan u la shah synran lang ha ka por ba katei ka kynhun ka leit da ka Pronoti Barman, LHV, Sheikh Latifa Nargish, PHN, Selim Miah, S.I., bad u Imran Haque, NCD DEO.
