Shillong, Rymphang 19: Ka CSWO ka kyrmen ba kine ki MDC ki ban iakhun mynta kin smai ba kin da jop kin iada ia ka Khyndew ka Shyiap, bad ruh ia ka riti ka dustur ka rukom bat khyndew ha ka Jylla ka jong ngi.
Kin Smai ruh ba ki jaka jong ka Jylla kan ym jah rngai shi inch ruh ne shah die ha ki riew shim kabu. Kin smai ruh ba kin iada ia ka Mariang, ia ki Khlaw ki btap, na ka jing pynjulor ki nong shim kabu. Kin smai ruh ba kin pynduh pyndam noh ia ki MDC Scheme bad kin trei hok ia la ka kamram balah bynshet ha ki.
Kin smai ruh ba kin ym bamsap, bad kin wanlam noh da ka District Council ka bym don party eiei ruh, bad kin smai ba kin shong noh khlem da ap san snem, lada kim trei kam bha eiei. Kin smai ruh ba kin ym buh sharak saw ha ki kali jong ki lada ki jop.
Lada kino kino ki Nongiakhun ki ba kloi ban smai ia kine ki kyndon te ka CSWO ka kyntu ia ki Paidbah ba kin jied beit khlem artatien ia kine ki Kyrtong, namar ka jingjied nongmih khmat kam dei ka jing leh kai. Ka dei ka jingjied ia ka lawei ka ba phyrnai na ka bynta ki khun ki kti jong ngi.(SP News)
