Shillong, Risaw 06: Mynta ka sngi 06/Risaw/2026 ka seng Hynniewtrep National Youth Movement kila leit ban ia kynduh ia u Lat ka jylla u C.H. Vijayashankar ban ai ia ka jingthoh ban pyrshah ban pynrung ia ka ktien Garo ha ki District Selection Examination ha ki hynniew tylli ki Distrik.
Haba kren ha ki lat pathai khubor hadien ba la ia kynduh ia u lat ka jylla la ong ba kane ka jingwan ia kynduh ka long ban ai ia ka jingthoh ha kaba iadei bad ka jingdawa ban pynrung ia ka ktien Garo ha ki District Selection Examination, kaba mut ha ki exam thung kam kiba hap hapoh ka jingpeit jong ka District Selection Committee.
U bah Louis u la ong ba na ka liang jong ka jaitbynriew Garo kila dawa ban pynrung ia ka ktien Garo ha ki exam ba pynlong da ki District Selection Committee, u la ong ba ha Meghalaya ki don hynniew tylli ki distrik, ka West Khasi Hills, ka South West Khasi Hills, ka Eastern West Khasi Hills, ka Ri Bhoi, ka East Jaintia Hills, ka West Jaintia Hills bad ka East Khasi Hills Distrik.
Ka jingkwah ban pynrung ia ka ktien Garo khnang ba ma ki kin ioh ban iakhun ia ka exam khnang ba kin ioh kam ioh jam ha kane ka jingiakynduh u lat ka jylla u la shah shkor ia ka jingpynsngew ka jong ki ba un shim khia ba kan nym don kano kano ka jingniew shiliang khmat ia ki trai ri trai muluk.
Haba iadei bad kane u Lat u la kular ba un khot ia u Advocate General ka jylla bad ki muktiar ba kin peit bniah ia kane ka bynta, ha kajuh ka por u la ai jingmut ia ka seng ba kan ia kynduh ia u myntri rangbah ka jylla bad ia ki ar ngut ki symbud myntri rangbah ba phin sngewthuh ia kaei ka jubab na ki.
