Shillong, Risaw 21: Ka seng samla pule ka KSU North Khasi Hills District Unit ha ryngkat ka KSU North Khasi Hills Eastern Border Area haka 20/Risaw/2026 kala pyllait ar tylli ki Ambulance ha Mawbri bad ha ka por janmiet la pynlong ruh ïa ka jingïalang ki Unit bad Circle jong ka KSU North Khasi Hills Eastern Border Area.
Ki ar tylli ki kali Ambulance kawei ka dei ka kali Bolero kaba la ai sngewbha da u bah Ngaitlang Dhar, katba kawei pat ka dei ka kali Eco jong ka KSU NKHD Unit. Kumban shu pynkynmaw ka KSU NKHD unit ka la buh ia ka Ambulance naduh u snem 2014 bad ka la shakri shibun ia ki paradoh parasnam kumjuh ia ki parabriew na kiwei pat ki jylla ha ri India.
Ka NKHEBA ruh ka la don la ka jong ka Ambulance naduh ki snem ba mynshwa kaba la shakri ia ki thaiñ khappud khamtam ha ki snem ba shah khniot ki paradoh parasnam ha ki bynta khappud jong ka Raid Nongtung kiba la shah ktah haduh katta eh ia ki.
Katkum ka jingthmu jong ka seng, ka Ambulance kaba la ai sngewbha da u bah Ngaitlang Dhar yn buh kyrpang ban ai jingshakri ha ki thaiñ Eastern Border Area. Ka kali Eco yn pyndonkam hapoh ka District Ri Bhoi, khnang ban pynsuk ïa ki paidbah, khamtam eh ïa kiba donkam kyrkieh ïa ka jingshakri ha ka pang ka shitom.
U bah Ngaitlang Dhar u la wan ban ïa don bynta kum u Kongsan, ha ka jingïadonlang u MLA ka Umroi Constituency, u Bah Damanbait Lamare, U President ka KSU NKHD Unit, Samla Ferdynald Kharkamni, U General Secretary, Samla James Hitler Mawphiang.
Kiwei kiba la don lang ki long u Parish Priest ka Mawbri Parish, u Fr. Balestine Marbaniang; u Dr. Bareh, Joint Director barim ka DHS, u Bah P.B. Sylliang, Secretary ka Synjuk ki Rangbah Shnong ka Ri Bhoi District, bad kiwei pat ki riew rangbah bad ki nongshah khot sngewbha.
Hashwa ban pyllait paidbah, u Fr. Balestine Marbaniang u la pynlong ïa ka jingduwai bad ka jingkyrkhu, ryngkat bad ka jingsynreit ïa ka um kyrkhu, khnang ba kine ki kali kin lah ban ai jingshakri kaba bha ïa ki paidbah. Hadien kata, la pyllait paidbah ïa kine ki kali da u Bah Ngaitlang Dhar bad u Samla Ferdynald Kharkamni.
Ha ka jingkren jong u, u Bah Ngaitlang Dhar u la ong ba bun ki briew ki ju pyrkhat ba u long uba riewspah, hynrei ka jingdon kaba kham kordor ka dei ka mynsiem ban ïarap ïa ki briew kiba donkam jingïarap, khamtam eh kiba pang ba shitom.
U la pynpaw ba bunsien u la ju ai sngewbha ïa ki kali Ambulance sha ki shnong, ki club bad ki seng bapher bapher, hynrei ka jingshakri kam ju neh hadien ba la dep ka sngi pdiang.
Kumta, u la kyntu ïa ki nongïalam ka KSU NKHD Unit ba kin shim ïa ka jingkitkhlieh ban sumar bad pynneh pynsah ïa kane ka kali, naduh ka sngi ba la aiti sha ka seng. U la ong ruh ba ka jingai sngewbha kam dei tang ban pynlong ïa ka sngi rakhe ne pdiang, hynrei ka dei ka jingaiti ïa ka jingkitkhlieh ban pynneh ïa ka jingshakri na ka bynta ka bha ka miat jong ki paidbah.
Ha ka por janmiet, ka KSU North Khasi Hills Eastern Border ka la pynlong ïa ka jingïakynduh lang jong baroh ki Unit bad Circle jong ka seng, ha kaba la ïoh ïa ka jingkren bad ka jingpynshai halor ki mat bapher bapher kiba ktah ïa ka jaitbynriew.
U Samla Eric A. Nongkynrih, Sports Secretary ka KSU Central Executive Council (CEC), u la ai ïa ka jingpynshai halor ka Meghalaya Identification, Registration (Safety & Security) of Migrant Workers Act, 2020 (MIRSS Act) bad ka Meghalaya Residents Safety and Security Act (MRSSA), 2016, khnang ban pynsngewthuh shuh shuh ïa ki dkhot jong ka seng halor kine ki aiñ bad ka jingdonkam jong ki.
U Bah Daniel Khyriem, Kum u President barim ka KSU CEC, u la kren halor ka phang “Ki Samla ki Long ka Lawei ka Jaitbynriew”. U la ai mynsiem ïa ki samla ba kin nang pynkhlaiñ ïa ka mynsiem ieid Ri bad ban don ka jingkitkhlieh ïa ka Ri bad ka jaitbynriew.
U la ban jur ba kum ki dkhot jong ka seng, ki samla ki dei ban trei shitom bad ban ïatreilang bad ki Dorbar Shnong, ki Seng Samla bad ki Seng Longkmie, khnang ban pynkhlaiñ ïa ka jingïatreilang bad ban kyntiew ïa ka bha ka miat jong ka jaitbynriew.
Lyngba Kane, ka KSU North Khasi Hills District Unit ka pynpaw ïa ka jingaiti jong ka ban ai jingshakri ïa ki paidbah lyngba ka jingïarap ha ka koit ka khiah, khamtam ha ki por ba donkam kyrkieh. Ha kajuh ka por, ka seng kan bteng ïa ka jingpynshai bad jingpynsngewthuh ïa ki samla halor ki aiñ, ki kamram bad ki mat kiba donkam na ka bynta ka Ri bad ka jaitbynriew.
