Gambegre, Risaw, 22: U Myntri Rangbah ka jylla Meghalaya, u Conrad K Sangma u la plie pyrda iaka Integrated Block Development Complex jong ka Gambegre ha ka jingiadon lang u MLA, u Mehtab Chandee A Sangma.
Ka Aking Nokma jong ka Gambegre, ka Chekme Ch Marak kala don lang ha kane ka prokram na ka bynta ban khap ribon jong ka jingplie iaka ophis block. Kala shah pynkup burom da u Conrad na ka bynta ka jingnoh synniang jong ka ha kaban iarap ban ai jaka ban maramot ia kane ka ophis block.
Haba u Conrad u la leit sha Gambegre, u la dep plie pyrda ruh iaka jaka pule kot ba pyniaid da ka digital bad ka ATM jong ka SBI ba thymmai ba dang shu plie.Ha katei ka prokram u Conrad u la ong ha ka histori jong ka jylla Meghalaya, baroh 56 tylli ki C&RD Block la dep tei thymmai.
U la ong ba bun ki skhim sorkar ki dei lyngba ki ophis block bad donkam iaki block ophis ba kin don iaki jingtei ba biang. Ha kajuh ka rukom, ka sorkar kala dep plie pyrda ruh iaki jingtei ba thymmai.
“Ha ka por ba nga leit jurip bun ki jylla bapher bapher, nga iohi ba bun ki block ophis kim biang ka rukom tei kaba lam sha ka jingdonkam ban tei da kiba thymmai,” ong u Conrad.
U la batai shai ruh shaphang ka kyrteng Integrated Block Development Office, kaba mut ba don ka jingmut ban pynbit pynbiang iaki paidbah, kynthup iaka syrnod schedule tribe, EPIC na ki ophis block. “Ngi kwah ban pynbiang iaki paidbah na ki ophis block lyngba ka jingpyn donkam da ka teknologi,” ong u Conrad.
U la ong ruh ba ka sorkar kan sa plie shen iaka CM Connect Centre ha kine ki ophis block. “Ngi la dep plie iaki CM Connect Centre ha ki block bapher bapher bad ha Gambegre ruh shen sa don ki CM Connect Centre.
Ka CM Connect Centre kan sa pynbiang iaki jingdonkam jong ki paidbah na ka bynta ki skhim bapher bapher bad kiwei kiwei ki rukom jingpyntreikam, kynthup iaka jing rejistar iaki jingeh ne jingmudui,” ong u Conrad. U la kyrpad iaki ophisar ba kin iatreilang naduh ka mynsiem bad ka hok kaba shisha ban shakri iaki paidbah.
U la ong ba ha ki ar snem ba la dep, ka sorkar kala dep pynbiang iaka Gambegre bad la sdang iaki kam pynroi bapher bapher. U MLA, u Mehtab Chandee u la pynpaw iaki jingeh jong ka Gambegre bad la dep sdang iaki kam pynroi bapher bapher.
Iaka Block Integrated Development Complex jong ka Gambegre C&RD Block, la pynlut T. 3.00 klur bad ka dei kawei na ki 40 tylli ki Block Integrated Development Complexes kaba la dep pynskhem ha u 2022-23. Na ki 40 tylli kine ki complex, 34 tylli la dep tei bad kiba sah sa 6 tylli lah jan pyndep bad ha ka jingkiew kaba 99.53 persen.
Ka Ri Lum Garo ka kynthup ia 17 na ki 40 tylli ki complex, kaba dei ka bynta kaba kham heh tam na kano kano ka jaka. Ha West Garo Hills, ki complex ha Gambegre, Selsella, Rongram, Tikrikilla bad Dalu kila dep lut, katba ka complex ha Dadenggre kala poi ha ka 99 percent. Ka complex ha Tikrikilla la plie paidbah ha ka 2 tarik Iaiong 2025 bad ka complex ha Dalu ha ka 17 tarik Iaiong 2026.
